മലപ്പുറം: സമാധാനപൂര്‍വം മുന്നോട്ടുപോകുന്ന മഹല്ലുകളില്‍ പ്രശ്‌നങ്ങള്‍ സൃഷ്ടിക്കാനുള്ള കാന്തപുരം സുന്നി വിഭാഗത്തിന്റെ നീക്കം പ്രതിഷേധാര്‍ഹമാണെന്നു സമസ്ത ലീഗല്‍ സെല്‍ ചെയര്‍മാന്‍ ഹാജി കെ. മമ്മത് ഫൈസി, കണ്‍വീനര്‍ പി.എ ജബ്ബാര്‍ ഹാജി എന്നിവര്‍ പ്രസ്താവനയില്‍ പറഞ്ഞു.
കഴിഞ്ഞ ദിവസം വയനാട്ടിലെ വാരാമ്പറ്റ മഹല്ലില്‍ പ്രശ്‌നങ്ങള്‍ സൃഷ്ടിച്ചതും ഇന്നലെ മലപ്പുറം കക്കോവ് ജുമാമസ്ജിദില്‍ ജുമുഅക്കു തടസം നില്‍ക്കുകയും ചെയ്തതാണ് ഏറ്റവും പുതുതായി ഉണ്ടായ സംഭവങ്ങള്‍. മഹല്ലുകളില്‍ സ്വാധീനമില്ലെന്നു ബോധ്യമാകുമ്പോള്‍ കായികമായി നേരിടുകയും ആസൂത്രിതമായി അക്രമങ്ങള്‍ അഴിച്ചുവിടുകയും ചെയ്യുകയാണ് വിവിധ സ്ഥലങ്ങളിലെ സംഭവവികാസങ്ങള്‍ സൂചിപ്പിക്കുന്നത്.
ഭരണസ്വാധീനത്തിന്റെ മറവില്‍ മഹല്ലുകളില്‍ ഭീകരാന്തരീക്ഷം സൃഷ്ടിക്കാനുള്ള ആസൂത്രിത നീക്കങ്ങള്‍ അപലപനീയമാണെന്നും ബന്ധപ്പെട്ട ഉദ്യോഗസ്ഥരും നിയമപാലകരും ഇക്കാര്യം തിരിച്ചറിയണമെന്നും നേതാക്കള്‍ പറഞ്ഞു. കക്കോവില്‍ കാന്തപുരം വിഭാഗം അക്രമത്തില്‍ പരുക്കേറ്റവരെ സമസ്ത ലീഗല്‍ സെല്‍ ഭാരവാഹികള്‍ ആശുപത്രിയില്‍ സന്ദര്‍ശിച്ചു.