പട്‌ന: കാലിത്തീറ്റ കുംഭകോണക്കേസില്‍ അനുകൂല വിധിക്കുവേണ്ടി ലാലുപ്രസാദ് യാദവിന്റെ അനുയായികള്‍ ഫോണില്‍ ബന്ധപ്പെട്ടുവെന്ന റാഞ്ചിയിലെ സി.ബി.ഐ കോടതി ജഡ്ജി ശിവ്പാല്‍ സിങിന്റെ പരാമര്‍ശത്തിനെതിരേ ആര്‍.ജെ.ഡി.
ജഡ്ജിയെ സ്വാധീനിച്ച് വിധി അനുകൂലമാക്കാന്‍ പാര്‍ട്ടി അംഗങ്ങളാരും വിളിച്ചിട്ടില്ലെന്ന് ഇന്നലെ പാര്‍ട്ടി നേതൃത്വം വ്യക്തമാക്കി. ആര്‍.ജെ.ഡി നേതാക്കളായ ശിവാനന്ദ് തിവാരി, ജഗ്ദാനന്ദ് സിങ് എന്നിവരാണ് ഇക്കാര്യം അറിയിച്ചത്. മാധ്യമങ്ങളിലൂടെ ജഡ്ജി നടത്തിയ പരാമര്‍ശത്തെക്കുറിച്ച് അറിയില്ല. എന്നാല്‍ അദ്ദേഹം പറഞ്ഞതുപോലെ പാര്‍ട്ടിയിലെ ആരും തന്നെ ജഡ്ജിയെ ഫോണില്‍ വിളിച്ചിട്ടില്ലെന്ന് തിവാരി പറഞ്ഞു.
ആരെങ്കിലും വിളിച്ചിട്ടുണ്ടെങ്കില്‍ അയാളുടെ പേര് എന്തുകൊണ്ട് ജഡ്ജി പുറത്തുവിടുന്നില്ല. ഫോണ്‍ വിളിച്ച ആള്‍ക്കെതിരേ എന്തുകൊണ്ട് നടപടിയെടുക്കാന്‍ ജഡ്ജി തയാറാകുന്നില്ലെന്നും അദ്ദേഹം ചോദിച്ചു.
ഒരു പക്ഷേ ലാലുവിനെ ഇഷ്ടപ്പെടുന്ന ആരെങ്കിലും ജഡ്ജിനെ വിളിച്ചിട്ടുണ്ടാകും. എന്നാല്‍ അക്കാര്യം വെളിപ്പെടുത്താന്‍ അദ്ദേഹം തയാറാകണമെന്നാണ് ജഗദാനന്ദ് സിങ് പറഞ്ഞത്.