പോത്തന്‍കോട്: ആശുപത്രിയില്‍ നിന്നും ചികിത്സ നല്‍കാതെ വിട്ടയച്ച അസം സ്വദേശിയായ സ്ത്രീ ആശുപത്രിയില്‍ നിന്ന് എത്തി മണിക്കൂറുകള്‍ക്കകം വീട്ടില്‍ പ്രസവിച്ചു.
വെള്ളിയാഴ്ച വൈകുന്നേരമാണ്  സംഭവം. അസം സ്വദേശി പ്രണവിന്റെ ഭാര്യ സിക്കക്കാണ് ദുരവസ്ഥ ഉണ്ടായത്.
ആശുപത്രിയില്‍ നിന്ന് വിട്ടയച്ച ശേഷം വീട്ടിലെത്തി സിക്ക വൈകുന്നേരത്തോടു കൂടി ഒരാണ്‍കുഞ്ഞിന് ജന്മം നല്‍കുകയായിരുന്നു.
പൂര്‍ണ ഗര്‍ഭിണിയായ ഇവര്‍ ഇന്നലെ  രാവിലെ കഠിനമായ വേദന അനുഭവപ്പെട്ടതിനെ തുടര്‍ന്ന് കന്യാകുളങ്ങര സര്‍ക്കാര്‍ ആശുപത്രിയില്‍ ചികിത്സ തേടി എത്തിയിരുന്നുവെങ്കിലും ഡോക്ടര്‍ ഇല്ലാത്തതിനാല്‍  മറ്റേതെങ്കിലും ആശുപത്രിയിലേക്ക് പോകാന്‍ നിര്‍ദേശിച്ചു ആശുപത്രി അധികൃതര്‍ പറഞ്ഞയച്ചു. എന്നാല്‍ ഭാഷ വശമില്ലാത്തതിനാലും സാമ്പത്തിക സ്ഥിതി മോശമായതിനാലും മറ്റ് ആശുപത്രിയിലേക്കൊന്നും പോകാതെ ഇവര്‍ വീട്ടിലേക്കു മടങ്ങി. വൈകുന്നേരത്തോടെ വേദന കലശലാകുകയും ആണ്‍കുഞ്ഞിനെ പ്രസവിക്കുകയും ചെയ്തു. അയല്‍പക്കത്തെ മുതിര്‍ന്ന സ്ത്രീകളാണ് പ്രസവ ശുശ്രൂഷ നല്‍കിയത്.  
വെമ്പായം പഞ്ചായത്തിലെ ആശാവര്‍ക്കര്‍ എത്തി  കന്യാകുളങ്ങര ആശുപത്രിയിലെ  ഡോക്ടറുമായി ബന്ധപ്പെട്ടു. തുടര്‍ന്ന് മാതാവിനെയും കുഞ്ഞിനെയും ഒട്ടോറിക്ഷയില്‍ കന്യാകുളങ്ങര ആശുപത്രിയില്‍ എത്തിച്ചു. ആശുപത്രിയില്‍ പ്രവേശിപ്പിച്ച അമ്മയുടെയും കുഞ്ഞിന്റെയും ആരോഗ്യനില തൃപ്തികരമാണെന്നു ആശുപത്രി അധികൃതര്‍ അറിയിച്ചു.