തിരുവനന്തപുരം: സംസ്ഥാനത്ത് റോഡപകടങ്ങളുടെയും അപകടങ്ങളില്‍ മരിക്കുന്നവരുടെയും എണ്ണം കുറഞ്ഞു. റോഡ് സുരക്ഷാ നടപടികള്‍ അധികൃതര്‍ കര്‍ശനമാക്കിയതിനെ തുടര്‍ന്നാണിത്.
2016ല്‍ 39,420 റോഡപകടങ്ങളാണ് സംസ്ഥാനത്തുണ്ടായത്. 2017ല്‍ ഇത് 38,462 ആയി കുറഞ്ഞു. 2016ല്‍ റോഡപകടങ്ങളില്‍ 4,287 പേരാണ് മരിച്ചത്. 2017ല്‍ 4,035 പേരും. ഗുരുതരമായി പരുക്കേറ്റവര്‍ 2016ല്‍ 30,100 ആയിരുന്നത് 2017ല്‍ 29,471 ആയി. ഗുരുതരമല്ലാത്ത പരുക്കേറ്റവരുടെ എണ്ണം 14,008ല്‍നിന്ന് 12,840 ആയും കുറഞ്ഞിട്ടുണ്ട്. മരണസംഖ്യയില്‍ ഗണ്യമായ കുറവുവന്നത് തിരുവനന്തപുരം, ആലപ്പുഴ, എറണാകുളം, ഇടുക്കി, തൃശൂര്‍, മലപ്പുറം, കോഴിക്കോട്, വയനാട്, കാസര്‍കോട് ജില്ലകളിലാണ്.
തിരുവനന്തപുരം, കൊല്ലം, പത്തനംതിട്ട, എറണാകുളം, ഇടുക്കി, തൃശൂര്‍, പാലക്കാട്, മലപ്പുറം, കോഴിക്കോട് ജില്ലകളില്‍ വാഹനാപകടങ്ങളുടെ എണ്ണത്തിലും കുറവുണ്ടായി.
ഗുരുതരമായി പരുക്കേറ്റവരുടെ എണ്ണത്തില്‍ തിരുവനന്തപുരം, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലാണ് കാര്യമായ കുറവുണ്ടായത്. തിരുവനന്തപുരം, കൊല്ലം, പാലക്കാട് എന്നിവ ഒഴികെയുള്ള ജില്ലകളിലെല്ലാംതന്നെ ഗുരുതരമല്ലാത്ത പരുക്കേറ്റവരുടെ എണ്ണത്തില്‍ കാര്യമായ കുറവുണ്ടായി.
റോഡപകടങ്ങള്‍ കുറയ്ക്കുന്നതിനായി സംസ്ഥാന സര്‍ക്കാരും പൊലിസും മോട്ടോര്‍ വാഹന വകുപ്പും മറ്റ് ഏജന്‍സികളും പദ്ധതികള്‍ ആവിഷ്‌കരിച്ചു നടപ്പാക്കിയിരുന്നു. സ്‌കൂള്‍ വിദ്യാര്‍ഥികളുടെ സഹകരണത്തോടെ റോഡ് സുരക്ഷാ ബോധവല്‍കരണത്തിനുള്ള ശുഭയാത്രാ പദ്ധതി, അപകടത്തില്‍പ്പെടുന്നവര്‍ക്ക് വേഗത്തില്‍ ചികിത്സ ലഭ്യമാക്കുന്നതിനുള്ള സോഫ്റ്റ് (സേവ് ഔവര്‍ ഫെലോ ട്രാവലര്‍) പദ്ധതി തുടങ്ങിയവ പൊലിസ് ആവിഷ്‌കരിച്ച പദ്ധതികളാണ്.
ഇതില്‍ സോഫ്റ്റ് പദ്ധതിക്ക് ദേശീയ അംഗീകാരം ലഭിച്ചിട്ടുണ്ട്. കൂടുതല്‍ അപകടങ്ങള്‍ നടന്ന മേഖലകള്‍ കണ്ടെത്തി പൊലിസിനെ വിന്യസിച്ചതും പൊലിസും മോട്ടോര്‍ വാഹന വകുപ്പും കൂടുതല്‍ നിരീക്ഷണ കാമറകളും ഇന്റര്‍സെപ്റ്റര്‍ പോലുള്ള ഉപകരണങ്ങളും സ്ഥാപിച്ചതും അപകടങ്ങള്‍ കുറയാന്‍ കാരണമായി.
കൂടാതെ അലക്ഷ്യമായ പാര്‍ക്കിങ് തടയാനുള്ള നടപടികളും രൂപംമാറ്റിയ വാഹനങ്ങള്‍ക്കെതിരായ നടപടികളും അപകടങ്ങള്‍ കുറയാനിടയാക്കി. 2017 അവസാനം സംസ്ഥാന പൊലിസ് ആസ്ഥാനത്തു നടന്ന ക്രൈം കോണ്‍ഫറന്‍സില്‍ ഈ വര്‍ഷം അപകടങ്ങളും അപകട മരണങ്ങളും കുറയ്ക്കുന്നതിന് കൂടുതല്‍ നടപടികള്‍ കൈക്കൊള്ളണമെന്ന് സംസ്ഥാന പൊലിസ് മേധാവി ലോക്‌നാഥ് ബെഹ്‌റ നിര്‍ദേശം നല്‍കിയിട്ടുണ്ട്.