പൂനെ: ഇന്‍ഫോസിസ് ജീവനക്കാരിയും മലയാളിയുമായ രസിലാ രാജുവിനെ കൊലപ്പെടുത്തിയ കേസിലെ പ്രതി ബാബന്‍ സൈകിയയുടെ പൊലിസ് കസ്റ്റഡി കാലാവധി ഈ മാസം ഏഴുവരെ നീട്ടി.
ഇന്‍ഫോസിസിലെ സെക്യൂരിറ്റി ജീവനക്കാരനായ സൈകിയയെ ജീവനക്കാരി കൊല്ലപ്പെട്ട ഉടന്‍തന്നെ പൊലിസ് അറസ്റ്റ് ചെയ്തിരുന്നു.
അസം ലഖിംപുര്‍ ജില്ലക്കാരനായ ഇയാളെ ശിവാജി നഗര്‍ സെഷന്‍സ് കോടതിയിലാണ് ഇന്നലെ ഹാജരാക്കിയിരുന്നത്. പൊലിസിന്റെ അപേക്ഷ പ്രകാരമാണ് ഇയാളുടെ കസ്റ്റഡി കാലാവധി നീട്ടിയത്.
അതേസമയം സൈകിയയുടെ കസ്റ്റഡി കാലാവധി ദീര്‍ഘിപ്പിച്ചതിനെ അയാളുടെ അഭിഭാഷകന്‍ തൗസിഫ് ഷെയ്ഖ് എതിര്‍ത്തു.
എല്ലാ തെളിവുകളും പൊലിസ് കണ്ടെടുത്ത സാഹചര്യത്തില്‍ എന്തിനാണ് കസ്റ്റഡി കാലാവധി ദീര്‍ഘിപ്പിച്ചതെന്നാണ് അഭിഭാഷകന്‍ ചോദിച്ചത്.
അതിനിടയില്‍ സൈകിയക്കുവേണ്ടി ഹാജരാകുന്ന മുഖ്യ അഭിഭാഷകന്‍ ബി.എസ് ആളൂരാണ്. അദ്ദേഹം ജൂനിയര്‍ അഭിഭാഷകര്‍ക്കൊപ്പമാണ് ഇന്നലെ കോടതിയില്‍ ഹാജരായിരുന്നത്.