ചെര്‍പ്പുളശ്ശേരി (പാലക്കാട്): അമേരിക്കന്‍ പ്രസിഡന്റ് ട്രംപിന്റെ മുസ്്‌ലിം പൗരന്മാരെ വിലക്കിയ വിവാദ നിലപാട് ഇസ്്‌ലാമിനെ സംബന്ധിച്ച അജ്ഞതകൊണ്ടാണെന്ന് പാണക്കാട് സയ്യിദ് ഹൈദരലി ശിഹാബ് തങ്ങള്‍. പൊട്ടച്ചിറ അന്‍വരിയ്യ അറബി കോളജ് 47ാം വാര്‍ഷിക - സനദ് ദാന സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ഇസ്്‌ലാമിനെ സംബന്ധിച്ച് മനസിലാക്കിയ അമേരിക്ക ഉള്‍പ്പടെയുള്ള ആഗോള ജനത ട്രംപിന്റെ വിവാദ നിലപാടിനെതിരേ രംഗത്ത് വന്നത് ആശാവഹമാണ്.

ഇസ്്‌ലാമിനെ സംബന്ധിച്ച ഇത്തരം തെറ്റിദ്ധാരണകളെ തിരുത്തുകയും യാഥാര്‍ഥ്യം പൊതുസമൂഹത്തിന് പകര്‍ന്നുനല്‍കുകയും ചെയ്യേണ്ട ബാധ്യത കര്‍മപഥത്തിലിറങ്ങുന്ന യുവപണ്ഡിതര്‍ക്കുണ്ടെന്നും തങ്ങള്‍ ഓര്‍മിപ്പിച്ചു. നമ്മുടെ രാജ്യത്തും ഭരണ കര്‍ത്താക്കളില്‍ നിന്ന് ന്യൂനപക്ഷങ്ങള്‍ക്കെതിരേയുള്ള നിലപാടുകളാണ് കാണാന്‍ കഴിയുന്നത്. ഐക്യത്തോടെ നീങ്ങിയിരുന്ന രാജ്യത്തെ ഛിന്നഭിന്നമാക്കാനുള്ള നീക്കമാണ് ഏക സിവില്‍ കോഡ് നടപ്പിലാക്കാനുള്ള ശ്രമത്തിന്റെ പിന്നിലെന്നും തങ്ങള്‍ കൂട്ടിച്ചേര്‍ത്തു. ഇസ്്‌ലാമിനെ കുറിച്ചുള്ള തെറ്റിദ്ധാരണകള്‍ നീക്കാന്‍ ഉതകുന്ന പ്രവര്‍ത്തനങ്ങള്‍ കൂടി മതഭൗതിക വിദ്യാഭ്യാസ സ്ഥാപനങ്ങള്‍ ഏറ്റെടുക്കേണ്ട സാഹചര്യമാണ് ഇപ്പോഴുള്ളതെന്നും ഹൈദരലി തങ്ങള്‍ പറഞ്ഞു.

സമസ്ത ജനറല്‍ സെക്രട്ടറി പ്രൊഫ. കെ.ആലിക്കുട്ടി മുസ്്‌ലിയാര്‍ അധ്യക്ഷനായി. എം.ടി അബ്ദുല്ല മുസ്്‌ലിയാര്‍ സനദ്ദാന പ്രസംഗം നടത്തി. എ.എം നൗഷാദ് ബാഖവി ചിറയന്‍കീഴ് മുഖ്യപ്രഭാഷണം നടത്തി. സമാപന ദിക്‌റ് ദുആ സമ്മേളനത്തിന് ഏലംകുളം ബാപ്പു മുസ്‌ലിയാര്‍ നേതൃത്വം നല്‍കി. ആലിയ ഏര്‍പ്പെടുത്തിയ ഫാത്വിമബീവി സ്മാരക അവാര്‍ഡിനര്‍ഹരായ അബ്ദുല്‍ ഗഫൂര്‍ അന്‍വരി മൂതൂര്‍, അശ്‌റഫ് അന്‍വരി പൈങ്കണ്ണിയൂര്‍, സ്വാലിഹ് അന്‍വരി ചേകനൂര്‍ എന്നിവര്‍ക്ക് ഹൈദരലി ശിഹാബ് തങ്ങള്‍ അവാര്‍ഡ് സമ്മാനിച്ചു.
സി.കെ.എം സാദിഖ് മുസ്‌ലിയാര്‍, സി.ടി യൂസുഫ് മുസ്‌ലിയാര്‍, സയ്യിദ് കെ.പി.സി തങ്ങള്‍ വല്ലപ്പുഴ, ഡോ.ബഹാഉദ്ദീന്‍ നദ്‌വി, നെല്ലായ കുഞ്ഞിമുഹമ്മദ് മുസ്്‌ലിയാര്‍,പി.കുഞ്ഞാണി മുസ്‌ലിയാര്‍, ആദൃശ്ശേരി ഹംസക്കുട്ടി മുസ്്‌ലിയാര്‍, ഹാജി.കെ മമ്മദ് ഫൈസി, സി. മുഹമ്മദ് മുസ്്‌ലിയാര്‍, അഡ്വ.ശംസുദ്ദീന്‍ എം.എല്‍.എ, സി.എ.എം.എ കരീം, കെ.സി അബൂബക്കര്‍ ദാരിമി, അബ്ദുല്ല അല്‍ഖാസിമി കുളപ്പറമ്പ്, അബ്ദുല്‍ ഗഫൂര്‍ അല്‍ഖാസിമി, ജി.എം സലാഹുദ്ദീന്‍ ഫൈസി, സി.എം ബഷീര്‍ ഫൈസി, മുസ്തഫ അഷ്‌റഫി കക്കുപ്പടി, കെല്ല മുഹമ്മദ്, മുഹമ്മദലി കുന്നപ്പള്ളി, ഹംസ ഹാജി കൊമ്പം, ടി.ടി അഹമ്മദ്, ഒ.കെ മൊയ്തു പ്രസംഗിച്ചു.