ചെന്നൈ: ജയലളിതയുടെ തോഴി വികെ ശശികലയെ തമിഴ്‌നാട് മുഖ്യമന്ത്രിയാക്കുന്നതിനെതിരെ പാര്‍ട്ടി പുറത്താക്കിയ രാജ്യസഭാ എംപി ശശികല പുഷ്പ രംഗത്ത്. വി.കെ ശശികല ക്രിമിനല്‍ പശ്ചാത്തലമുള്ള വ്യക്തിയാണ്. ഇവരെ മുഖ്യമന്ത്രിയാക്കിയാല്‍ അതു ക്രമസമാധാന പ്രശ്‌നങ്ങള്‍ക്ക് ഇടയാക്കും. ശശികലക്കെതിരെ നിലവില്‍ ക്രിമിനല്‍ കേസുണ്ട്.യാതൊരു അടിത്തറയുമില്ലാതെയാണ് ശശികല മുഖ്യമന്ത്രി സ്ഥാനത്തേക്ക് എത്താന്‍ ശ്രമിക്കുന്നതെന്നും ശശികല പുഷ്പ പ്രധാനമന്ത്രി നരേന്ദ്രമോദിക്കും തമിഴ്‌നാട് ഗവര്‍ണര്‍ സി.എച്ച് വിദ്യാസാഗര്‍ റാവുവിനും അയച്ച കത്തില്‍ ചൂണ്ടിക്കാണിക്കുന്നു.

ജയലളിത ആശുപത്രിയിലായിരുന്ന കാലത്ത് ശശികലയെ പിന്‍ഗാമിയായോ പാര്‍ട്ടി അധ്യക്ഷ സ്ഥാനത്തേക്കോ ശിപാര്‍ശ ചെയ്തിട്ടില്ല. ഏകാധിപത്യ സ്വഭാവത്തില്‍ പാര്‍ട്ടിയുടെ നിയന്ത്രണം പിടിച്ചടക്കാന്‍ ശശികല ശ്രമിക്കുകയാണെന്നും ഇവര്‍ കത്തില്‍ പറയുന്നു.

ജയലളിതയ്‌ക്കൊപ്പം അനധികൃത സ്വത്തു സമ്പാദനക്കേസില്‍ വികെ ശശികലയെും ബംഗളൂരു വിചാരണ കോടതി ശിക്ഷിച്ചിരുന്നതായും കത്തില്‍ ചൂണ്ടിക്കാണിക്കുന്നു.

കഴിഞ്ഞ ദിവസം എഐഎഡിഎംകെ അധ്യക്ഷയായി ശശികലയെ തെരഞ്ഞെടുത്തതിനു പിന്നാലെ ജയലളിതയുടെ പിന്‍ഗാമിയായി മുഖ്യമന്ത്രി സ്ഥാനത്തെത്തിയ ഒ പനീര്‍ശെല്‍വം രാജിവെച്ചിരുന്നു. കൂടാതെ അടുത്ത ആഴ്ച്ച തന്നെ ശശികല മുഖ്യമന്ത്രിയായി സത്യപ്രതിജ്ഞ ചെയ്യുമെന്നും റിപ്പോര്‍ട്ടുണ്ടായിരുന്നു.