കോഴിക്കോട്: ജനങ്ങളുടെ സ്വസ്ഥജീവിതത്തിനു ഭീഷണിയായി ജില്ലയില്‍ പെരുകിവരുന്ന ക്വട്ടേഷന്‍ സംഘങ്ങള്‍ക്കു തടയിടാന്‍ സ്‌പെഷല്‍ ഡ്രൈവുമായി സിറ്റി പൊലിസ്. നഗരത്തിന്റെ പല ഭാഗങ്ങളിലും ക്വട്ടേഷന്‍ സംഘങ്ങളുടെ ആക്രമണം പെരുകിവരുന്നതായി ശ്രദ്ധയില്‍ പെട്ടതിന്റെ അടിസ്ഥാനത്തിലാണ് സ്‌പെഷല്‍ ഡ്രൈവ് സംഘടിപ്പിക്കുന്നത്.
ജില്ലയുടെ വിവിധ ഭാഗങ്ങളിലും അതതു ഭാഗത്തെ പൊലിസ് സ്റ്റേഷന്റെ സഹായത്തോടെ സ്‌പെഷല്‍ ഡ്രൈവ് നടത്താനും നീക്കമുണ്ട്. നഗരത്തില്‍ വച്ചു യുവാക്കളെ ആക്രമിച്ച ഗുണ്ടാ സംഘത്തെ കഴിഞ്ഞ ദിവസം ടൗണ്‍ പൊലിസ് അറസ്റ്റ് ചെയ്തിരുന്നു. ആക്രമണത്തിനിരയായ യുവാക്കള്‍ കോഴിക്കോട് ബീച്ച് ആശുപത്രിയില്‍ ചികിത്സയിലാണ്. പിടിയിലായ ക്വട്ടേഷന്‍ സംഘാംഗങ്ങളെല്ലാം ബോക്‌സിങ്ങില്‍ പരിശീലനം നേടിയവരാണ്. വാഹനത്തെ മറികടന്നതിന്റെ പേരിലാണു യുവാക്കളെ സംഘം ആക്രമിച്ചത്.
ഗുണ്ടാസംഘങ്ങളില്‍പ്പെട്ടവരെല്ലാം കരാട്ടെയിലോ ബോക്‌സിങ്ങിലോ പരിശീലനം നേടിയവരായതിനാല്‍ ജില്ലയിലെ ബോക്‌സിങ്-കരാട്ടെ പരിശീലന കേന്ദ്രങ്ങളില്‍ പരിശോധന നടത്താനാണ് ഉദ്യോഗസ്ഥരുടെ നീക്കം. കഴിഞ്ഞ ആറു മാസത്തിനിടെ നഗരത്തില്‍ മാത്രം ഏഴ് ക്വട്ടേഷന്‍ ആക്രമണങ്ങളാണ് റിപ്പോര്‍ട്ട് ചെയ്തത്. പാവപ്പെട്ട കുടുംബങ്ങളിലെ കുട്ടികളും പാതിവഴിയില്‍ പഠനം ഉപേക്ഷിച്ച കുട്ടികളുമാണു പ്രധാനമായും ക്വട്ടേഷന്‍ സംഘത്തിലുള്ളതെന്ന് പൊലിസ് ഉദ്യോഗസ്ഥര്‍ പറയുന്നു. വളരെ വേഗത്തില്‍ പണമുണ്ടാക്കാമെന്നതാണ് ഇത്തരം സംഘങ്ങളിലേക്കു യുവാക്കളെ ആകര്‍ഷിക്കുന്നത്. ഇങ്ങനെ കിട്ടുന്ന പണം മുഴുവന്‍ ഇവര്‍ ആഡംബര ജീവിതത്തിനാണ് ഉപയോഗിക്കുന്നത്. അതിനുപുറമെ, സംഘാംഗങ്ങളില്‍ ഭൂരിഭാഗം പേരും മദ്യത്തിനോ മയക്കുമരുന്നിനോ അടിമപ്പെട്ടവരുമാണ്.
തുടര്‍ച്ചയായി നടക്കുന്ന സ്‌പെഷല്‍ ഡ്രൈവിലൂടെ ജില്ലയിലെ ക്വട്ടേഷന്‍ സംഘത്തെ ഒരു പരിധിവരെയെങ്കിലും ചെറുക്കാന്‍ സാധിക്കുമെന്ന പ്രതീക്ഷയിലാണ് സിറ്റി പൊലിസ്.