ന്യൂഡല്‍ഹി: ആറുദിവസത്തെ സന്ദര്‍ശനത്തിനായി ഇന്ത്യയിലെത്തിയ ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹുവിനെ ഡല്‍ഹി വിമാനത്താവളത്തില്‍ പ്രധാനമന്ത്രി നരേന്ദ്ര മോദി നേരിട്ടെത്തി സ്വീകരിച്ചു.
നെതന്യാഹുവിനെ സ്വാഗതം ചെയ്ത മോദി, അദ്ദേഹത്തെ ആശ്ലേഷിച്ച ശേഷം അദ്ദേഹത്തിന്റെ സന്ദര്‍ശനം ചരിത്രപരമായും വൈശിഷ്ട്യം കൊണ്ടും പ്രധാനമാണെന്ന് വ്യക്തമാക്കി. ഇസ്‌റാഈലുമായുളള ഇന്ത്യയുടെ ബന്ധം ദൃഢമാക്കാന്‍ ഈ സന്ദര്‍ശനം ഉപകരിക്കുമെന്നും മോദി കൂട്ടിച്ചേര്‍ത്തു.
ഇരു നേതാക്കളും വിവിധ വിഷയങ്ങളെക്കുറിച്ച് വിശദമായ ചര്‍ച്ച നടത്തുമെന്നും വിദേശ കാര്യമന്ത്രാലയവും പ്രധാനമന്ത്രിയുടെ ഓഫിസും അറിയിച്ചു.
തീന്‍മൂര്‍ത്തി മെമ്മോറിയലില്‍ എത്തിയ ഇരുവരും തീന്‍മൂര്‍ത്തി ചൗക്കിന്റെ പേര് ഇസ്‌റാഈല്‍ നഗരമായ ഹെയ്ഫയുടെ പേരുകൂടി ചേര്‍ത്ത് തീന്‍മൂര്‍ത്തി ഹെയ്ഫാ ചൗക്ക് എന്നാക്കി പ്രഖ്യാപിക്കുകയും ചെയ്തു.