വടകര: മൂന്നര ലക്ഷം രൂപയുടെ കുഴല്‍പ്പണവുമായി രണ്ടുപേര്‍ വടകരയില്‍ പിടിയിലായി. വില്യാപ്പള്ളി സ്വദേശി മുത്തലിബ്, കുന്നുമ്മക്കരയിലെ സക്കരിയ എന്നിവരെയാണ് ഡി.വൈ.എസ്.പിയുടെ സ്‌പെഷല്‍ സ്‌ക്വാഡ് പിടികൂടിയത്. പുതിയ സ്റ്റാന്‍ഡ് പരിസരത്ത് നിന്നു സക്കരിയ്യയെ കസ്റ്റഡിയിലെടുത്ത് ചോദ്യം ചെയ്തതിനെ തുടര്‍ന്നാണ് മുത്തലിബ് വലയിലായത്. ഇയാളാണ് വിതരണത്തിനു പണം നല്‍കിയതെന്ന് സക്കരിയ മൊഴി നല്‍കി. ഈ വിവരത്തിന്റെ അടിസ്ഥാനത്തില്‍ മുത്തലിബിന്റെ വീട്ടില്‍ നടത്തിയ പരിശോധനയില്‍ പണം പിടികൂടുകയായിരുന്നു. മുന്‍പ് കുഴല്‍പ്പണം കടത്തിയ കേസിലെ പ്രതിയാണ് മുത്തലിബ്. അഞ്ചു മൊബൈല്‍ ഫോണുകളും പണം ലഭിക്കേണ്ടവരുടെ പേരടങ്ങിയ കുറിപ്പും പൊലിസ് കണ്ടെടുത്തിട്ടുണ്ട്.