കരുനാഗപ്പള്ളി: റെയില്‍വ്വേ മേല്‍പ്പാലം നിര്‍മ്മിക്കണമെന്നാവശ്യപ്പെട്ട് പാളത്തില്‍ തലവച്ച് കിടന്ന് പ്രതിഷേധം. ഗതാഗതം തടസ്സപ്പെട്ടപ്പോള്‍ മാറ്റാന്‍ നോക്കിയ ഗെയ്റ്റ് കീപ്പര്‍ക്ക് മര്‍ദനം. ഒടുവില്‍ നാട്ടുകാരെത്തി പൊലിസിലേല്‍പ്പിച്ചു. ആവശ്യം ന്യായമാണെങ്കിലും ആള്‍ മദ്യപിച്ചിരുന്നതു കൊണ്ട് കാര്യം മറ്റൊരു രീതിയില്‍ പര്യവസാനിച്ചു.

കൊല്ലം കരുനാഗപ്പള്ളി പുതിയകാവ് ചക്കുവള്ളിറോഡിലെ ചിറ്റുമൂലറെയില്‍വേ ഗേറ്റിലാണ് സംഭവം. രാത്രി 8.30 ന് മദ്യപിച്ചെത്തിയ ഇയാള്‍ റെയില്‍വേ പാളത്തില്‍ കയറി നിന്ന് ബഹളം ഉണ്ടാക്കി. ഇയാളെ പിടിച്ച് മാറ്റാന്‍ ചെന്ന ഗേറ്റ് കീപ്പര്‍ സുധീറിനെ ക്രൂരമായി മര്‍ദ്ദിക്കുന്നത് കണ്ട നാട്ടുകാര്‍ ഇയാളെ പിടിച്ച് മാറ്റി വിവരം കരുനാഗപ്പള്ളി പൊലിസ് സ്റ്റേഷനില്‍ അറിക്കുകയായിരുന്നു. പൊലിസെത്തി ഇയാളെ അറസ്റ്റ് ചെയ്തു.

ഗേറ്റ് അടഞ്ഞുകിടന്നത് മൂലം ഒരു മണിക്കൂറോളം വാഹന ഗതാഗതം തടസ്സപ്പെട്ടു. മര്‍ദനം ഏറ്റ ഗേറ്റ് കീപ്പറെ ആശുപത്രിയിലാക്കി. റെയില്‍ പാളത്തില്‍ തലവച്ച് കിടന്ന ഇയാളുടെ ഏക ആവിശ്യം ചിറ്റുമൂല റെയില്‍വേ ക്രോസ്സില്‍ മേല്‍പ്പാലം നിര്‍മ്മിക്കണമെന്നായിരുന്നു. ഇടക്കുളങ്ങരയില്‍ ഒരു വാടക വീട്ടില്‍ താമസിക്കുന്നയാളെന്ന് പറയപ്പെടുന്നു.