തിരുവനന്തപുരം: സംസ്ഥാനത്തെ 38 സര്‍ക്കാര്‍ കോളജുകളില്‍ പ്രിന്‍സിപ്പല്‍മാരില്ല. എല്ലാ സ്ഥലത്തും ഇന്‍ചാര്‍ജ്ജ് ഭരണം. മാത്രമല്ല, പല കോളജുകളിലും ഭരണം നടത്തുന്നത് യു.ജി.സി മാനദണ്ഡം അനുസരിച്ചുള്ള യോഗ്യതയില്ലാത്തവരും. സംസ്ഥാനത്ത് 58 സര്‍ക്കാര്‍ ആര്‍ട്‌സ് ആന്റ് സയന്‍സ് കോളജുകളില്‍ 20 എണ്ണത്തില്‍ മാത്രമാണ് യോഗ്യതയുള്ള പ്രിന്‍സിപ്പല്‍മാരെ നിയമിച്ചിട്ടുള്ളത്. അധ്യാപകനായ വിദ്യഭ്യാസ മന്ത്രി പല പ്രാവശ്യം യോഗ്യരായവരെ നിയമിക്കാന്‍ ഒരുങ്ങിയെങ്കിലും ഇടതു, വലതു അധ്യാപക സംഘടനകള്‍ എതിര്‍പ്പുമായി രംഗത്തു വന്നു. ഇതേ തുടര്‍ന്ന് നിലവിലുള്ള സാഹചര്യം നിലനിര്‍ത്താന്‍ തീരുമാനിക്കുകയായിരുന്നു. നിലവില്‍ അധ്യാപകരില്‍ സീനിയറായ ഒരാള്‍ക്ക് പ്രിന്‍സിപ്പലിന്റെ ചുമതല നല്‍കുക മാത്രമാണ് ചെയ്തിരിക്കുന്നത്്. ഫലത്തില്‍ യോഗ്യതയുള്ള അധ്യാപകരെ മാത്രമേ പ്രിന്‍സിപ്പലായി നിയമിക്കാവൂ എന്ന ഹൈക്കോടതി ഉത്തരവിനെയും സര്‍ക്കാര്‍ അട്ടിമറിച്ചിരിക്കുകയാണ്.

യു.ജി.സി നിയമം പാലിച്ചിട്ടുള്ള ഡോക്ടറേറ്റ് യോഗ്യതയുള്ളവരെ മാത്രമേ പ്രിന്‍സിപ്പല്‍മാരായി നിയമിക്കാവൂവെന്ന് 2016 ഫെബ്രുവരിയില്‍ ജസ്റ്റിസുമാരായ ഹരിപ്രസാദ്, പി.ബി സുരേഷ്‌കുമാര്‍ എന്നിവരടങ്ങിയ ഡിവിഷനല്‍ ബെഞ്ച് ഉത്തരവിട്ടിരുന്നു. ഇതേ തുടര്‍ന്ന് സംസ്ഥാനത്തെ എല്ലാ സ്വകാര്യ ആര്‍ട്‌സ് ആന്റ് സയന്‍സ് കോളജുകളില്‍ യോഗ്യതയുള്ളവരെ പ്രിന്‍സിപ്പലായി നിയമിച്ചു. എന്നാല്‍ സര്‍ക്കാര്‍ കോളജുകളില്‍ പ്രിന്‍സിപ്പല്‍മാരെ നിയമിക്കാന്‍ സര്‍ക്കാര്‍ തയാറായില്ല. ഡോക്ടറേറ്റ് ഉള്ള പല അധ്യാപകരും പ്രിന്‍സിപ്പല്‍ ആകാന്‍ കഴിയാതെ സര്‍വിസില്‍ നിന്നു വിരമിക്കേണ്ട സ്ഥിതിയിലാണ്. 2010 സെപ്റ്റംബര്‍ 18 മുതലാണ് കോളജുകളില്‍ പ്രിന്‍സിപ്പല്‍ സ്ഥാനത്തേക്ക് യു.ജി.സി മാനദണ്ഡം നടപ്പിലാക്കിയത്. എന്നാല്‍ സര്‍ക്കാര്‍ കോളജുകളിലെ അധ്യാപകര്‍ ഇത് അംഗീകരിക്കാന്‍ തയാറായില്ല. യു.ജി.സി മാനദണ്ഡം നടപ്പിലാക്കാന്‍ എല്ലാ സര്‍ക്കാര്‍ കോളജുകളിലെയും സീനിയര്‍ അധ്യാപകര്‍ക്ക് ഡോക്ടറേറ്റ് എടുക്കാന്‍ ശമ്പളത്തോടെ അന്ന് അവധിയും നല്‍കിയിരുന്നു. എന്നാല്‍ അവധിയെടുത്ത് ശമ്പളവും കൈപ്പറ്റിയ ശേഷം ആരും പ്രബന്ധം അവതരിപ്പിച്ചില്ല. എന്നിട്ടും പ്രിന്‍സിപ്പലിന്റെ കസേരയിലേക്ക് ഇവര്‍ മടങ്ങി വരികയും ചെയ്തു. ഇതേ തുടര്‍ന്നാണ് ഡോക്ടറേറ്റും പ്രിന്‍സിപ്പല്‍ ആകാന്‍ യോഗ്യതയുമുള്ള ഒരു വിഭാഗം അധ്യാപകര്‍ ഹൈക്കോടതിയെ സമീപിച്ചത്. സര്‍ക്കാര്‍ കോളജുകളില്‍ പ്രിന്‍സിപ്പല്‍മാരെ നിയമിക്കാന്‍ തടയിടുന്നത് അധ്യാപക യൂനിയനുകള്‍ തന്നെയാണ്. ഡോക്ടറേറ്റ് ഉള്ളവരെ പ്രിന്‍സിപ്പല്‍മാരാക്കിയാല്‍ സീനിയോരിറ്റി ആനുകൂല്യത്തില്‍ ഇപ്പോള്‍ പ്രിന്‍സിപ്പലിന്റെ കസേരയിലിരിക്കുന്നവര്‍ ഡീപ്രമോട്ട് ചെയ്യപ്പെടും. അതിനാലാണ് യൂനിയന്‍ ശക്തമായ എതിര്‍പ്പുമായി രംഗത്തുള്ളത്. അതേ സമയം, പ്രിന്‍സിപ്പല്‍മാരെ നിയമിക്കുന്നതില്‍ ഉടന്‍ തീരുമാനമുണ്ടാകുമെന്നും മന്ത്രിക്ക് പ്രത്യേക താല്‍പര്യമുണ്ടെന്നും കോളജിയറ്റ് വിദ്യാഭ്യാസ ഡയറക്ടര്‍ എം.എസ് ജയ പറഞ്ഞു.