കൂത്തുപറമ്പ്: സെല്‍ഫിയെടുത്തതിന് മര്‍ദനമേറ്റ വിദ്യാര്‍ഥി ജീവനൊടുക്കിയ സംഭവം അന്വേഷിക്കണമെന്ന് ആവശ്യപ്പെട്ട് ബാലാവകാശ കമ്മിഷനില്‍ പരാതി. കാവുംഭാഗം ഗവ. ഹയര്‍സെക്കന്‍ഡറി സ്‌കൂള്‍ പ്ലസ്ടു വിദ്യാര്‍ഥി മമ്പറം പവര്‍ലൂംമെട്ടയിലെ ഉത്രം ഹൗസില്‍ സനാഥ് (17) ആണ് ജീവനൊടുക്കിയത്. നിസാരപ്രശ്‌നം സ്‌കൂള്‍ അധികൃതര്‍ കൈകാര്യം ചെയ്തതിലുണ്ടായ അനാസ്ഥയും ഉത്തരവാദിത്വമില്ലായ്മയുമാണ് മരണത്തിന് കാരണമെന്ന് പിതാവ് ഒ.സി സത്യനാഥന്‍ നല്‍കിയ പരാതിയില്‍ പറയുന്നു.
 കഴിഞ്ഞ മാസം 27ന് വൈകിട്ടാണ് സനാഥിനെ വീട്ടില്‍ തൂങ്ങിമരിച്ച നിലയില്‍ കണ്ടെത്തിയത്. വിദ്യാര്‍ഥിനിയടക്കമുള്ള സഹപാഠികളായ നാലു വിദ്യാര്‍ഥികള്‍ സെല്‍ഫിയെടുക്കുന്നത് ശ്രദ്ധയില്‍പ്പെട്ട അധ്യാപിക ഫോട്ടോ രക്ഷിതാക്കള്‍ക്ക് അയച്ചുകൊടുത്തതാണ് പ്രശ്‌നങ്ങള്‍ക്കിടയാക്കിയത്.
വിദ്യാര്‍ഥിനിയുടെ പിതാവ് അന്വേഷിക്കാനെത്തിയപ്പോള്‍ പ്രിന്‍സിപ്പല്‍ സനാഥിനെ മാത്രം വിളിച്ചുവരുത്തിയെന്നും തുടര്‍ന്ന് എട്ടോളംവരുന്ന സംഘം മകനെ ക്രൂരമായി മര്‍ദിച്ചെന്നും പരാതിയില്‍ ചൂണ്ടിക്കാട്ടുന്നു.