മലപ്പുറം: സംസ്ഥാനത്തു സ്വാശ്രയ വിദ്യഭ്യാസ സ്ഥാപനങ്ങള്‍ നടത്തുന്ന പകല്‍കൊള്ളയ്ക്കു കടിഞ്ഞാണിടുമെന്നു സഹകരണ മന്ത്രി കടകംപള്ളി സുരേന്ദ്രന്‍. ജില്ലാ കോ ഓപറേറ്റീവ് കോളജ് കലേത്സവം ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാനത്തു വിദ്യാഭ്യാസ മേഖലയിലെ പ്രശ്‌നങ്ങള്‍ക്കു കാരണം സ്വാശ്രയ ആധിപത്യമാണെന്നും സംസ്ഥാനാടിസ്ഥാനത്തില്‍ കോ ഓപറേറ്റീവ് കോളജ് വിദ്യാര്‍ഥികളുടെ കലോത്സവം നടത്താന്‍ ഈ സര്‍ക്കാര്‍ മുന്‍കൈയെടുക്കുമെന്നും മന്ത്രി പറഞ്ഞു.
പി. ഉബൈദുല്ല എം.എല്‍.എ അധ്യക്ഷനായി. സഹകരണ മേഖലയിലെ പ്രമുഖ സഹകാരികളെ ജില്ലാപഞ്ചായത്ത് പ്രസിഡന്റ് എ.പി ഉണ്ണി കൃഷ്ണന്‍ ആദരിച്ചു. സംഗീത സംവിധായകന്‍ ശിവദാസ വാര്യര്‍ മുഖ്യാതിഥിയായി. മലപ്പുറം മുനിസിപ്പല്‍ ചെയര്‍പേഴ്‌സണ്‍ സി.എച്ച് ജമീല, വൈസ് ചെയര്‍മാന്‍ പെരുമ്പള്ളി സൈത്, പി.പി വാസുദേവന്‍, കെ.വി ശശികുമാര്‍, ഒ. സഹദേവന്‍, മിര്‍ഷാദ് ഇബ്രാഹിം, ജി.ബി മുരളീധരന്‍, കെ. വിനോദ്, കരീം മുതുകാട്ടില്‍, പാലൊളി കുഞ്ഞിമുഹമ്മദ്, മജീദ് ഇല്ലിക്കല്‍ സംസാരിച്ചു.
ജില്ലയിലെ 18 കോ ഓപറേറ്റീവ് കോളജുകളില്‍നിന്നായി ആയിരത്തി അഞ്ഞൂറിലധികം പ്രതിഭകളാണ് കലോത്സവത്തില്‍ മാറ്റുരക്കുന്നത്. ഇന്നു വൈകിട്ട് 5.30ന് നടക്കുന്ന സമാപന സമ്മേളനം മന്ത്രി ഡോ. കെ.ടി ജലീല്‍ ഉദ്ഘാടനം ചെയ്യും.