അന്തിക്കാട്: കാല്‍ കിലോയോളം കഞ്ചാവുമായി രണ്ട് യുവാക്കളെ അന്തിക്കാട് എക്‌സൈസ് വിഭാഗം പിടികൂടി. പെരുമ്പടപ്പ് സ്വദേശി ആഷിക്, പുന്നയൂര്‍കുളം സ്വദേശി അഖില്‍ എന്നിവരെയാണ് കാഞ്ഞാണി ബസ് സ്റ്റാന്‍ഡ് പരിസരത്തു നിന്ന് എക്‌സൈസ് റേഞ്ച് ഇന്‍സ്‌പെക്ടര്‍ കെ.സുധാകരന്റെ നേതൃത്വത്തിലുള്ള സംഘം പിടികൂടിയത്.വിദ്യാര്‍ഥികളെയും നിര്‍മാണ തൊഴിലാളികളെയും ലക്ഷ്യം വെച്ചാണ് വില്‍പ്പന നടത്തിവന്നിരുന്നത്. അഞ്ച് ഗ്രാമിന്റെ പൊതി ഒന്നിന് ഇരുന്നൂറ് രൂപയാണ് ഇവര്‍ ഈടാക്കിയിരുന്നത്. തമിഴ്‌നാട്ടിലെ കമ്പം ,തേനി, തിരുപ്പതി എന്നിവിടങ്ങളില്‍ നിന്നും എത്തിക്കുന്ന കഞ്ചാവുകള്‍ വിദ്യാര്‍ഥികള്‍ക്കിടയില്‍ മുത്ത്, സിം എന്നീ കോഡ് ഭാഷകളിലും നിര്‍മ്മാണ തൊഴിലാളികള്‍ക്കിടയില്‍ കട്ട, ചാന്ത് എന്നിങ്ങനെയുള്ള കോഡ് ഭാഷകളിലാണ് വിറ്റ് വന്നിരുന്നത്.
മേഖലയില്‍ ദിവസങ്ങളായി എക്‌സൈസ് വിഭാഗം നടത്തിവന്നിരുന്ന രഹസ്യ നീരീക്ഷണത്തിനൊടുവിലാണ് യുവാക്കള്‍ പിടിയിലാകുന്നത്. പ്രിവന്റീവ് ഓഫിസര്‍മാരായ എ.ബി.പ്രസാദ്, പി.എസ്.കൃഷ്ണരാജ്, സിവില്‍ ഓഫിസര്‍മാരായ കെ.ജെ.ലോനപ്പന്‍, സി.ജെ.റിജോ, സി.എല്‍. ജെയ്ന്‍, പി.ജയശ്രീ എന്നിവര്‍ ചേര്‍ന്നാണ് ഇവരെ പിടികൂടിയത്.