വെള്ളറട: ഗ്രാമപഞ്ചായത്തിലെ പൂവന്‍കോഴി 79 നമ്പര്‍ അങ്കണ്‍വാടിയിലെ വൈദ്യുതി കണക്ഷന്‍ അധികൃതര്‍ വിച്ഛേദിച്ചിട്ടു രണ്ടു വര്‍ഷം. അങ്കണവാടിയിലെ കുട്ടികളും അധ്യാപികയും ദുരിതത്തിലാണ്.
സമീപത്തുള്ള ഖാദി നെയ്ത്ത് പരിശീലന കേന്ദ്രത്തിലേക്ക് വൈദ്യുതി എടുത്തുവെന്ന് ആരോപിച്ചാണ്  രണ്ടു വര്‍ഷം മുന്‍പ് വൈദ്യുതി വകുപ്പധികൃതര്‍ ഇവിടുത്തെ കണക്ഷന്‍ വിച്ഛേദിച്ചത്. 47995 രൂപ പിഴ ചുമത്തുകയും ചെയ്തു. രണ്ടു വര്‍ഷം പിന്നിട്ടിട്ടും കുട്ടികളുടെ ദുരിതത്തിന് പരിഹാരം കാണാന്‍ പഞ്ചായത്ത് അധികൃതര്‍ക്കായിട്ടില്ല. അതേ സമയം അങ്കണവാടിയില്‍ നിന്ന് രഹസ്യമായി വൈദ്യുതി എടുത്ത നെയ്ത്ത് പഠന കേന്ദ്രത്തിനാകട്ടെ  പഞ്ചായത്ത് തന്നെ പുതിയ വൈദ്യുതി കണക്ഷന്‍ തരപ്പെടുത്തി കൊടുക്കുകയും ചെയ്തു.
പത്തിലധികം വിദ്യാര്‍ഥികള്‍ അങ്കണവാടിയില്‍ എത്തുന്നുണ്ടെങ്കിലും  ചൂട് സഹിക്കാനാകാതെ ഒരു മണിക്കൂര്‍ പിന്നിടുമ്പോഴേക്കു വീട്ടിലേക്കു മടങ്ങും. ആസ്ബസ്‌റ്റോസ് ഷീറ്റ് പാകിയ കെട്ടിടത്തില്‍ ഫാനുകള്‍ പ്രവര്‍ത്തിക്കാത്തതിനാല്‍ അസഹ്യമായ ചൂടാണ് അനുഭവപ്പെടുന്നത്.  അങ്കണ്‍വാടിക്കു വേണ്ടി സ്ഥാപിച്ച കുടിവെള്ള പമ്പും വൈദ്യുതിയില്ലാത്തതിനാല്‍ പ്രവര്‍ത്തിക്കുന്നില്ല. പ്രാഥമികാവശ്യങ്ങള്‍ക്കും കുടിക്കുന്നതിനുമുള്ള വെള്ളം ദൂരെ നിന്ന് ചുമന്ന് കൊണ്ടുവരേണ്ട സ്ഥിതിയാണ്.
ഈയടുത്ത്  പഞ്ചായത്തിലെ വെല്‍ഫെയര്‍ കമ്മിറ്റി കൂടി വൈദ്യുതി പുനസ്ഥാപിക്കണമെന്ന് തീരുമാനമെടുത്തെങ്കിലും  പിഴ അടക്കാന്‍ പഞ്ചായത്ത് അധികൃതര്‍ തയാറായിട്ടില്ല.