തിരുവനന്തപുരം: കൊച്ചിയില്‍ കെട്ടിടത്തില്‍ നിന്നും വീണു പരുക്കേറ്റു കിടന്നയാളെ ആശുപത്രിയിലെത്തിക്കാന്‍ മുന്‍കൈയെടുത്ത അഭിഭാഷക രഞ്ജിനിയ്ക്ക് നിയമസഭയുടെ അഭിനന്ദനം. രഞ്ജിനിയുടെ ഇടപെടല്‍ അഭിനന്ദനാര്‍ഹമാണെന്ന് മുഖ്യമന്ത്രി സഭയില്‍ പറഞ്ഞു.

ശനിയാഴ്ച്ച വൈകീട്ടാണ് എറണാങ്കുളം പത്മ ജംഗ്ഷനിലെ ലോഡ്ജിന്റെ നാലാം നിലയില്‍ നിന്നും സജി താഴേക്ക് വീണത്. ഈ സമയം റോഡില്‍നിറയെ വാഹനങ്ങളും ജനങ്ങളും ഉണ്ടായിരുന്നെങ്കിലും ആരും തിരിഞ്ഞുനോക്കിയില്ല. സജിയുടെ ജീവന്‍ രക്ഷിക്കാന്‍ ആരും മുന്നോട്ടുവരാത്തത് സമീപത്തെ സി.സി.ടി.വി ദൃശ്യങ്ങളില്‍ വ്യക്തമാണ്. ജീപ്പും കാറുമൊക്കെ ചോരവാര്‍ന്നുകിടക്കുന്ന സജിയുടെ സമീപത്തുകൂടി കടന്നുപോകുകയായിരുന്നു. ഒടുവില്‍ അതുവഴിവന്ന അഭിഭാഷക രഞ്ജിനി രാമാനന്ദാണ് സജിയെ രക്ഷിക്കാന്‍ മുന്നിട്ടിറങ്ങിയത്.

സജിയെ ആശുപത്രിയിലെത്തിക്കാന്‍ അതുവഴിവന്ന ഓട്ടോ ഡ്രൈവറോട് അഭിഭാഷക പലതവണ ആവശ്യപ്പെട്ടെങ്കിലും തയാറായില്ല. പിന്നീട് കാര്‍ തടഞ്ഞുനിര്‍ത്തി എറണാകുളം ജനറല്‍ ആശുപത്രിയില്‍ എത്തിക്കുകയായിരുന്നു. സംഭവത്തിന്റെ സി.സി ടിവി ദൃശ്യങ്ങള്‍ സമൂഹമാധ്യമങ്ങള്‍ വഴി പ്രചരിച്ചിരുന്നു. ഈ സാഹചര്യത്തിലാണ് ഇന്ന് ചേര്‍ന്ന് നിയമസഭാ യോഗത്തില്‍ മുഖ്യമന്ത്രി രഞ്ജിനിയെ അഭിനന്ദിച്ചത്.