കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴില്‍ തീര്‍ഥാടനത്തിന് അവസരം ലഭിച്ചവര്‍ക്ക് ആദ്യഗഡുപണം അടക്കാന്‍ ഇനി ലഭിക്കുക രണ്ടുദിവസം മാത്രം. ഈ മാസം 12വരെയാണ് കേന്ദ്രഹജ്ജ് കമ്മിറ്റി ആദ്യ ഗഡുവായ 81,000 രൂപ അടക്കാന്‍ സമയം അനുവദിച്ചത്. ഇതില്‍ ഇന്നും തിങ്കളാഴ്ചയുമാണ് ബാങ്ക് പ്രവൃത്തി ദിനങ്ങളുള്ളത്.
സംസ്ഥാന ഹജ്ജ് കമ്മിറ്റിക്ക് കീഴില്‍ അവസരം ലഭിച്ചവരില്‍ ഒന്‍പതിനായിരത്തിലേറെ പേരും പണം അടച്ച് രേഖകള്‍ കരിപ്പൂര്‍ ഹജ്ജ് ഹൗസില്‍ എത്തിച്ചിട്ടുണ്ട്. ആദ്യഗഡു കഴിഞ്ഞ മാസം 31നുള്ളില്‍ അടക്കണമെന്നായിരുന്നു നിര്‍ദേശിച്ചിരുന്നത്. എന്നാല്‍ തീര്‍ഥാടകരുടെ ആവശ്യം മുന്‍നിര്‍ത്തി സംസ്ഥാന ഹജ്ജ് കമ്മിറ്റി ഇടപെട്ടതോടെയാണ് തിയതി നീട്ടിയത്. മക്ക,മദീന എന്നിവിടങ്ങളില്‍ താമസത്തിനുള്ള കെട്ടിടങ്ങളുടെ വാടക നിശ്ചയിച്ചതിനു ശേഷമായിരിക്കും രണ്ടാംഗഡു തുകയെത്രയെന്ന് തീരുമാനിക്കുക. സബ്‌സിഡി ഇല്ലാത്തതിനാല്‍ ഇത്തവണ തുക കൂടും.

ലഗേജ് 55 കിലോ മാത്രം

കൊണ്ടോട്ടി: ഹജ്ജ് തീര്‍ഥാടകര്‍ക്ക് യാത്രയില്‍ കാണ്ടുപോകാന്‍ അനുവദിക്കപ്പെട്ടത് 55 കിലോ ബാഗേജ്.
45 കിലോ ബാഗേജ് ലഗേജിലും 10 കിലോ ഹാന്‍ഡ് ബാഗേജുമായാണ് അനുവദിക്കുക.
ലഗേജുകള്‍ തീര്‍ഥാടകരുടെ വിമാനത്തില്‍ തന്നെ കൊണ്ടുപോവുകയും കൊണ്ടുവരികയും ചെയ്യണമെന്ന് കേന്ദ്രഹജ്ജ് കമ്മിറ്റി വിമാന കമ്പനികളോട് ആവശ്യപ്പെട്ടിട്ടുണ്ട്.

കേരളത്തില്‍ നിന്ന് 11 കുട്ടികള്‍ക്ക് അവസരം

കൊണ്ടോട്ടി: സംസ്ഥാന ഹജ്ജ് കമ്മിറ്റിക്ക് കീഴില്‍ തീര്‍ഥാടനത്തിന് ഇത്തവണ 11 കുട്ടികള്‍ക്ക് അവസരം.
രണ്ട് വയസിന് താഴെയുള്ള 22 കുട്ടികള്‍ക്കാണ് അവസരം ലഭിച്ചത്.
ഹജ്ജ് അപേക്ഷകരില്‍ അന്‍പതിലേറെ കുട്ടികള്‍ ഉണ്ടായിരുന്നു. എന്നാല്‍ നറുക്കെടുപ്പില്‍ 11 പേര്‍ക്ക് മാത്രമാണ് അവസരം കൈവന്നത്.