പൊവ്വല്‍: കണ്ണൂരില്‍ സംസ്ഥാന സ്‌കൂള്‍ കലോത്സവ സമാപന വേദിയില്‍ പാട്ടുപാടി കൈയടി നേടിയ മന്ത്രി കൗമാരകലോത്സവത്തിലും പാട്ടുപാടി. ആയിരം പാദസരങ്ങള്‍ കിലുങ്ങി എന്നതായിരുന്നു ഗാനം. സ്റ്റേജിന മത്സരങ്ങളുടെ ഉദ്ഘാടന പ്രസംഗത്തിനിടെയുള്ള പാട്ട് നിറഞ്ഞ കൈയടികളോടെയാണ് സദസ് സ്വീകരിച്ചത്. വര്‍ഗീയതയും വിഭാഗീയതയും അരങ്ങു വാഴുന്ന കാലത്ത് വിദ്യാര്‍ഥികള്‍ ജാഗരൂകരാവണമെന്നും കലാവിഷ്‌കാരത്തിലൂടെ അവയെക്കെതിരേ പോരാടാന്‍ തയാറാവണമെന്നും മന്ത്രി പറഞ്ഞു. നന്മയുള്ള മനസുകളില്‍ മാത്രമേ കലയുണ്ടാവുകയുള്ളുവെന്നും സമൂഹത്തിലെ ദുഷ്ടശക്തികളെ നശിപ്പിക്കാന്‍ ഈ കലകള്‍ കൊണ്ടു സാധിക്കുമെന്നും അദ്ദേഹം പറഞ്ഞു. ഇത്തരം കലാവിഷ്‌കാരങ്ങള്‍ നടക്കുന്ന വേദികളാണു കലോത്സവങ്ങള്‍. ജീവിതം സംഗീതത്തിലിധിഷ്ഠിതമാണെന്നും ജീവിതമാകുന്ന സംഗീതത്തില്‍ അപശ്രുതികള്‍ സംഭവിക്കുമ്പോഴാണ് പ്രശ്‌നങ്ങളുണ്ടാവുന്നെന്നും കൂട്ടിച്ചേര്‍ത്തു. ചടങ്ങില്‍ സര്‍വകലാശാല ചെയര്‍മാന്‍ എം.കെ വിഷ്ണു അധ്യക്ഷനായി. സിനിമാ താരം അയ്യപ്പ ബൈജു മൂഖ്യാതിഥിയായി. സര്‍വകലാശാല വൈസ് ചാന്‍സലര്‍ ഡോ. എം.കെ ഖാദര്‍ മാങ്ങാട്, കോളജ് പ്രിന്‍സിപ്പല്‍ മുഹമ്മദ് ശുക്കൂര്‍, പ്രസ് ക്ലബ് പ്രസിഡന്റ് സണ്ണി ജോസഫ്, പി.പി ശ്യാമളാദേവി, ഖദീജത്ത് സുഹൈല, അമ്പിളി നാരായണന്‍, ബി വൈശാഖ് സംബന്ധിച്ചു.