തൃശൂര്‍: സംസ്ഥാന സര്‍ക്കാരിന്റെ വിവിധ മിഷനുകളുടെ പ്രവര്‍ത്തനങ്ങളില്‍ പങ്കാളികളാകണമെന്ന് സി.പി.എം സമ്മേളനത്തില്‍ പ്രമേയം. വിദ്യാഭ്യാസം, ആരോഗ്യം, സാമൂഹ്യസുരക്ഷ, ജനാധിപത്യപരമായ ജീവിതക്രമം തുടങ്ങിയ മേഖലകളില്‍ ചില പ്രശ്‌നങ്ങള്‍ ഉയര്‍ന്നുവന്നിട്ടുണ്ട്. അത്തരം മേഖലകളിലെ നവീകരണത്തിന് വേണ്ടിയുള്ള കാഴ്ചപ്പാടുകള്‍ പ്രകടനപത്രികയില്‍ മുന്നോട്ടുവച്ചിട്ടുണ്ട്. ജനങ്ങള്‍ക്ക് നല്‍കിയ വാഗ്ദാനങ്ങള്‍ നിറവേറ്റി നവകേരളം സൃഷ്ടിക്കുന്നതിനുള്ള എല്‍.ഡി.എഫ് സര്‍ക്കാരിന്റെ ഇടപെടലിന്റെ ഭാഗമായാണ് നാല് മിഷനുകള്‍ സംഘടിപ്പിച്ചിട്ടുള്ളത്. സംസ്ഥാനത്തെ മുഴുവന്‍ ഭവന രഹിതര്‍ക്കും പാര്‍പ്പിടം ലഭ്യമാക്കുന്നതിനുള്ള സമഗ്ര പദ്ധതിയെന്ന നിലയിലാണ് ലൈഫ് മിഷന് രൂപം നല്‍കിയിട്ടുള്ളത്. ഇനിയും പൂര്‍ത്തിയാകാത്ത 67,750 വീടുകളുടെ നിര്‍മാണം ആദ്യഘട്ടമെന്ന നിലയില്‍ നടന്നുവരികയാണ്. 10,000ത്തോളം വീടുകള്‍ പൂര്‍ത്തിയായി. ബാക്കിയുള്ളവ മെയ് 31 ന് മുന്‍പ് പൂര്‍ത്തീകരിക്കും.