പ്രാഗ്: പ്രമുഖ സിറിയന്‍ കുര്‍ദ് നേതാവ് ചെക്ക് റിപബ്ലിക്കില്‍ അറസ്റ്റിലായി. സിറിയയിലെ ഏറ്റവും വലിയ കുര്‍ദ് പ്രസ്ഥാനമായ ഡെമോക്രാറ്റിക് യൂനിയന്‍ പാര്‍ട്ടി(പി.വൈ.ഡി)യുടെ മുന്‍ ഉപാധ്യക്ഷനായ സാലിഹ് മുസ്‌ലിം ആണ് ചെക്ക് തലസ്ഥാനമായ പ്രാഗില്‍ വച്ച് പിടിയിലായത്. തുര്‍ക്കിയുടെ അറസ്റ്റ് വാറന്റിലാണു നടപടി.
തുര്‍ക്കി ഭീകരവാദിയായി പ്രഖ്യാപിച്ച സാലിഹിനെ പിടികൂടാന്‍ സഹായിക്കുന്നവര്‍ക്ക് പത്തു ലക്ഷം ഡോളര്‍ ഇനാം പ്രഖ്യാപിച്ചിരുന്നു. 2016ല്‍ തുര്‍ക്കി തലസ്ഥാനം അങ്കാറയില്‍ നടന്ന ഒരു ബോംബ് ആക്രമണവുമായി ബന്ധപ്പെട്ട കേസില്‍ സാലിഹ് കുറ്റാരോപിതനാണ്. സൈനിക ആസ്ഥാനത്ത് കാവല്‍പ്പടയെ ലക്ഷ്യമിട്ടാണ് ആക്രമണം നടന്നത്. സംഭവത്തില്‍ 37 പേര്‍ കൊല്ലപ്പെട്ടിരുന്നു.