തിരുവനന്തപുരം: കേരളം നേരിടാന്‍ പോകുന്ന ഗുരുതര ഗതാഗത പ്രശ്‌നത്തിനു പരിഹാരമായി മുന്നോട്ടുവച്ച അതിവേഗ റെയില്‍ ഇടനാഴി പദ്ധതി ഇഴഞ്ഞു നീങ്ങുന്നു. പദ്ധതി പ്രവര്‍ത്തനം ഇപ്പോഴത്തെ നിലയിലാണ് മുന്നോട്ടുപോകുന്നതെങ്കില്‍ അതിവേഗ ട്രെയിന്‍ ഓടുത്തുടങ്ങാന്‍ 2030വരെയെങ്കിലും കാത്തിരിക്കേണ്ടിവരും. അതിവേഗ റയില്‍ പാതക്കായി റിപ്പോര്‍ട്ട് സമര്‍പ്പിച്ച് കാത്തിരിക്കുന്ന ഡല്‍ഹി മെട്രോ റെയില്‍ കോര്‍പ്പറേഷന്‍ ഇക്കാര്യത്തില്‍ ഇനി എന്തു നടപടിയെടുക്കുമെന്നത് സുപ്രധാനമാകും.
കേരള അതിവേഗ റയില്‍ കോര്‍പ്പറേഷന്‍(കെ.എച്ച്.എസ്.ആര്‍.സി.എല്‍) രൂപീകരിച്ചതിനു ശേഷം ഡി.എം.ആര്‍.സിയാണ് കേരളത്തില്‍ അതിവേഗ റെയില്‍പ്പാത സംബന്ധിച്ച് സാധ്യതാ പഠനം നടത്തി 2010ല്‍ റിപ്പോര്‍ട്ട് സമര്‍പ്പിച്ചത്. ഈ റിപ്പോര്‍ട്ടിന്റെ അടിസ്ഥാനത്തില്‍ തിരുവനന്തപുരം മുതല്‍ കാസര്‍കോടുവരെ പദ്ധതി വേണ്ടെന്നും കണ്ണൂര്‍വരെ മാത്രം മതിയെന്നും നിര്‍ദേശമുണ്ടായിരുന്നു. ഈ റിപ്പോര്‍ട്ട് സംസ്ഥാന സര്‍ക്കാറിനു സമര്‍പ്പിക്കാനായി വിശദ പഠനം നടത്താന്‍ ചൈനാ കമ്പനിയായ ലേമെയറിനെ ഏല്‍പിക്കുകയായിരുന്നു. ലേമെയര്‍ റിപ്പോര്‍ട്ട് നല്‍കിയെങ്കിലും പിന്നീട് കാര്യമായ നീക്കങ്ങളൊന്നും ഇക്കാര്യത്തിലുണ്ടായിട്ടില്ല.
ലേമെയറിന്റെയും ഡി.എം.ആര്‍.സിയുടേയും കെ.എച്ച്.എസ്.ആര്‍.സി.എല്ലിന്റേയും പ്രതിനിധികള്‍ ഒരുമിച്ചിരുന്ന് ചര്‍ച്ച നടത്തിയാല്‍ മാത്രമേ അതിവേഗ റെയിലിന്റെ കാര്യത്തില്‍ അന്തിമ പദ്ധതി റിപ്പോര്‍ട്ടാകൂ. പക്ഷേ ചൈന കമ്പനിയായതിനാല്‍ ലേമെയറിന്റെ പ്രതിനിധികള്‍ക്ക് കേരളത്തില്‍ എത്തുന്നതിന് വിസ ലഭ്യമാകുന്ന കാര്യത്തില്‍ കേന്ദ്ര സര്‍ക്കാരില്‍നിന്ന് തടസങ്ങളുണ്ടെന്നു പറയുന്നു. ഈ തടസങ്ങള്‍ മാറി ലേമെയറിന്റെ പ്രതിനിധികള്‍ എത്തിയാല്‍ മാത്രമേ കേരളത്തിലെ അതിവേഗ റയിലിന്റെ കാര്യത്തില്‍ ഒരിഞ്ചെങ്കിലും മുന്നോട്ടുപോകാനാകൂ. വിശദ പദ്ധതി റിപ്പോര്‍ട്ട് അന്തിമരൂപത്തിലാക്കിയാല്‍ മാത്രമേ കെ.എച്ച്.എസ്.ആര്‍.സി.എല്ലിന് അത് സംസ്ഥാന സര്‍ക്കാരിന് സമര്‍പ്പിക്കാനാകൂ.
അത് സംസ്ഥാന സര്‍ക്കാര്‍ പരിശോധിച്ചശേഷമാകും കേന്ദ്ര സര്‍ക്കാരിന് കൈമാറുക. കേന്ദ്ര സര്‍ക്കാരിന്റെ അനുമതിക്കു ശേഷം മാത്രമേ പദ്ധതിയുടെ വായ്പ നേടുന്നത് ഉള്‍പ്പെടെയുള്ള സാമ്പത്തിക കാര്യങ്ങളിലും സ്ഥലം ഏറ്റെടുക്കലിലേക്കും മറ്റും മുന്നോട്ടുപോകാനാകൂ. ഇത്തരത്തിലാണ് കാര്യങ്ങള്‍ നീങ്ങുന്നതെങ്കില്‍ 2030 വരെയെങ്കിലും പദ്ധതിക്കായി കാത്തിരിക്കേണ്ടി വരും.
ഇതിനിടെയാണ് കേരളത്തിന്റെ അതിവേഗ റയില്‍പ്പാത മാംഗ്ലൂര്‍ വരെ നീട്ടുന്നതിനായി മുഖ്യമന്ത്രി പിണറായി വിജയന്‍ കര്‍ണാടക സര്‍ക്കാരിന് കത്തെഴുതിയതായുള്ള വാര്‍ത്തകള്‍ പുറത്തുവരുന്നത്.