ഫറോക്ക്: ഫാറൂഖ് കോളജില്‍ അധ്യാപക- അനധ്യാപക ജീവനക്കാരും വിദ്യാര്‍ഥികളും തമ്മിലുണ്ടായ സംഘര്‍ഷത്തില്‍ എട്ടു വിദ്യാര്‍ഥികള്‍ക്കും ജീവനക്കാരനും പരുക്കേറ്റു. രണ്ടാം വര്‍ഷ ബിരുദ വിദ്യാര്‍ഥികള്‍ ഹോളി ആഘോഷിച്ചതിനെ ചൊല്ലിയുള്ള തര്‍ക്കമാണ് സംഘര്‍ഷത്തില്‍ കലാശിച്ചത്. ഇന്നലെ ഉച്ചയ്ക്ക് രണ്ടരയോടെയാണ് സംഭവം.
വാദ്യങ്ങളുമായി എത്തിയ വിദ്യാര്‍ഥികളുടെ കാര്‍ സുവോളജി ലാബ് അസിസ്റ്റന്റ് എ.പി ഇബ്രാഹിംകുട്ടി തടഞ്ഞുവച്ചതോടെയാണ് പ്രശ്‌നത്തിന് തുടക്കം. വാക്കേറ്റത്തിനിടെ ഇബ്രാഹിംകുട്ടി ഷബാബ് എന്ന വിദ്യാര്‍ഥിയുടെ മുഖത്ത് അടിച്ചു. പിന്നീട് അധ്യാപക- അനധ്യാപകര്‍ കൂട്ടത്തോടെയെത്തി ഗെയ്റ്റിനു പുറത്തുവന്ന് ഹോളി ആഘോഷത്തിന്റെ ഭാഗമായി ചായം പൂശിയ വിദ്യാര്‍ഥികളെ മര്‍ദിക്കുകയായിരുന്നു.
കോളജ് ഹോസ്റ്റലിലും കാന്റീനിലും ഫാറൂഖ് കോളജ് അങ്ങാടിയിലും വിദ്യാര്‍ഥികള്‍ക്കു നേരെ അക്രമമുണ്ടായി. ഇതില്‍ ഏഴു വിദ്യാര്‍ഥികള്‍ക്ക് പരുക്കേറ്റു. വാദ്യോപകരണങ്ങള്‍ കോളജിനകത്തു പ്രവേശിപ്പിച്ചത് ചോദ്യം ചെയ്ത തന്നെ കാറിടിച്ച് അപായപ്പെടുത്താന്‍ ശ്രമിച്ചുവെന്ന് ഇബ്രാഹിംകുട്ടി പറഞ്ഞു. സംഭവത്തില്‍ ഫറോക്ക് പൊലിസ് കേസെടുത്തു. പരുക്കേറ്റവരെ നഗരത്തിലെ വിവിധ ആശുപത്രികളില്‍ പ്രവേശിപ്പിച്ചു. ഫാറൂഖ് കോളജില്‍ കഴിഞ്ഞ തിങ്കളാഴ്ച മൂന്നാം വര്‍ഷ വിദ്യാര്‍ഥികള്‍ നടത്തിയ ഹോളി ആഘോഷത്തിനെതിരേ നാട്ടുകാര്‍ പരാതി നല്‍കിയിരുന്നു. റസിഡന്‍സ് അസോസിയേഷനുകളുടെ നേതൃത്വത്തില്‍ ജാഗ്രതാ സമിതി രൂപീകരിച്ചാണ് പൊലിസിലും കോളജ് അധികൃതര്‍ക്കും പരാതി നല്‍കിയത്. വിദ്യാര്‍ഥികളുടെ ആഘോഷം അതിരുവിടുന്നെന്നും ശല്യമാവുന്നുവെന്നുമാണ് നാട്ടുകാരുടെ പരാതി.