തിരുവനന്തപുരം: സംസ്ഥാനത്തെ ആദ്യത്തെ സഞ്ചരിക്കുന്ന ടി.ബി ലാബ് സജ്ജമായി. ക്ഷയരോഗ നിര്‍ണയത്തിനായി ആശുപത്രികളില്‍ ഇനി മണിക്കൂറുകളോളം ക്യൂ നില്‍ക്കേണ്ട. രോഗികള്‍ക്ക് ആശ്വാസമായി ക്ഷയരോഗ നിര്‍ണയ പരിശോധനകള്‍ എല്ലായിടത്തും ലഭ്യമാക്കുന്നതിന്റെ ഭാഗമായാണ് പദ്ധതി.
പരിശോധനാ സംവിധാനങ്ങളില്ലാത്ത ഉള്‍പ്രദേശങ്ങള്‍, ആദിവാസി മേഖലകള്‍, യാത്രാസൗകര്യം കുറഞ്ഞ ജനവാസ കേന്ദ്രങ്ങള്‍, ഇതര സംസ്ഥാന തൊഴിലാളികള്‍ താമസിക്കുന്ന സ്ഥലങ്ങള്‍, സാമൂഹ്യ സുരക്ഷാ സ്ഥാപനങ്ങള്‍ എന്നിവിടങ്ങളില്‍ സൗജന്യ ക്ഷയരോഗ നിര്‍ണയ പരിശോധനകള്‍ ലഭ്യമാക്കുന്നതിന് മുന്‍ഗണന നല്‍കുകയെന്ന ലക്ഷ്യം മുന്‍നിര്‍ത്തിയാണ് മൊബൈല്‍ ലാബ് തയാറാക്കിയിരിക്കുന്നത്. പരിശോധനാ ഫലം തയാറാക്കി നല്‍കുന്നതിനുള്ള സംവിധാനവും വാനിലുണ്ട്.
കേന്ദ്ര, സംസ്ഥാന സര്‍ക്കാരുകള്‍ സംയുക്തമായി ആരോഗ്യ വകുപ്പിന്റെ സഹകരണത്തോടെയാണ് വാന്‍ സജ്ജമാക്കിയത്. രണ്ട് മണിക്കൂറിനകം പരിശോധനാ ഫലം ലഭിക്കുമെന്നതാണ് പ്രത്യേകത. ഒന്നു മുതല്‍ 10 ദിവസം വരെ ഓരോ ജില്ലകളിലും ക്യാംപ് ചെയ്താണ് ലാബിന്റെ പ്രവര്‍ത്തനം, കണ്ണൂരിന് ശേഷം കാസര്‍കോട്, വയനാട് ജില്ലകളിലായിരിക്കും ലാബിന്റെ സേവനം ലഭിക്കുക. തുടര്‍ന്ന് ബാക്കിയുള്ള ജില്ലകളിലും മൊബൈല്‍ ലാബെത്തും. നൂതന ജനിതക സാങ്കേതികവിദ്യയുടെ സഹായത്തോടെ ക്ഷയരോഗനിര്‍ണയം നടത്തുന്നതിനും മരുന്നുകളെ പ്രതിരോധിക്കുന്ന തരം (എം.ഡി.ആര്‍. എക്‌സ്.ഡി.ആര്‍.) ക്ഷയരോഗമാണോയെന്ന് തിരിച്ചറിയുന്നതിനുള്ള അത്യാധുനിക സംവിധാനമായ സിബിനാറ്റ് (സി.ബി.എന്‍.എ.എ.ടി) സജ്ജീകരണങ്ങളോടും കൂടിയതാണ് വാന്‍. ഈ പരിശോധന പുറത്ത് നിന്നു ചെയ്യുവാന്‍ 5000രൂപയ്ക്ക് മുകളില്‍ ചെലവ് വരും. എന്നാല്‍ ടി.ബി മൊബൈല്‍ യൂനിറ്റില്‍ പരിശോധനകള്‍ പൂര്‍ണമായും സൗജന്യമാണ്.