കൊടുവള്ളി: പെണ്‍കുട്ടികളുടെ വസ്ത്രധാരണയുമായി ബന്ധപ്പെട്ട പരാമര്‍ശത്തില്‍ ഫാറൂഖ് ട്രെയ്‌നിങ് കോളജ് അധ്യാപകന്‍ ജൗഹര്‍ മുനവ്വറിനെതിരേ കേസെടുത്ത നടപടിയില്‍ പ്രതിഷേധിച്ച് എസ്.വൈ.എസിന്റെ നേതൃത്വത്തില്‍ കൊടുവള്ളി പൊലിസ് സ്റ്റേഷന്‍ റാലി നടത്തി. സംസ്ഥാന സെക്രട്ടറി നാസര്‍ ഫൈസി കൂടത്തായി ഉദ്ഘാടനം ചെയ്തു. ഒരു വിദ്യാര്‍ഥിനിയുടെ ഇ-മെയില്‍ പരാതിയില്‍ ആവശ്യമായ അന്വേഷണം നടത്താതെ കേസെടുത്ത കൊടുവള്ളി പൊലിസിന്റെ നടപടി അപലപനീയമാണെന്ന് അദ്ദേഹം പറഞ്ഞു.
മാന്യമായി വസ്ത്രധാരണം നടത്തണമെന്ന അധ്യാപകന്റെ പരാമര്‍ശത്തില്‍ സഭ്യേതരമായി എന്താണുള്ളതെന്ന് കേസെടുത്തവര്‍ വ്യക്തമാക്കണം. മതവിശ്വാസവുമായി ബന്ധപ്പെട്ട് ജനങ്ങളെ ഉദ്‌ബോധിപ്പിക്കാന്‍ സമാന രീതിയില്‍ പ്രഭാഷണങ്ങള്‍ നടത്തിയ ഇതര മത വിഭാഗങ്ങളില്‍ പെട്ട പുരോഹിതന്‍മാര്‍ക്കെതിരേ കേസെടുക്കാതെ മുസ്‌ലിം വിഭാഗത്തിലെ മതപ്രഭാഷകര്‍ക്കെതിരേ മാത്രം കേസെടുക്കുന്ന നടപടി അവസാനിപ്പിച്ചില്ലെങ്കില്‍ ശക്തമായ പ്രക്ഷോഭ പരിപാടികള്‍ക്ക് എസ്.വൈ.എസ് നേതൃത്വം നല്‍കുമെന്നും അദ്ദേഹം വ്യക്തമാക്കി.
സി.എച്ച് മഹ്മൂദ് സഅദി അധ്യക്ഷനായി. മലയമ്മ അബൂബക്കര്‍ ഫൈസി, ഒ.പി അഷ്‌റഫ്, പി.സി കുഞ്ഞാലന്‍ കുട്ടി ഫൈസി, കെ.പി കോയ, റഷീദ് ഫൈസി വെള്ളായിക്കോട,് എ.ടി മുഹമ്മദ് മാസ്റ്റര്‍ സംസാരിച്ചു. റാലിക്ക് ഫൈസല്‍ ഫൈസി മടവൂര്‍ , ഇസ്മായില്‍ ഹാജി എടച്ചേരി, യൂസുഫ് ഫൈസി വെണ്ണക്കോട്, കെ.എം.എ റഹ്മാന്‍ നേതൃത്വം നല്‍കി.