കൊടുങ്ങല്ലൂര്‍: എടവിലങ്ങില്‍ ബി.ജെ.പി പ്രവര്‍ത്തകനായ നല്ലയില്‍ പ്രമോദ് (38) തലക്കടിയേറ്റ് മരിച്ച കേസില്‍ നാല് പ്രതികളെ പൊലിസ് അറസ്റ്റ് ചെയ്തു. ശ്രീനാരായണപുരം സ്വദേശികളായ ഉല്ലാസ വളവ് പൂത്തോട്ട് ടുട്ടു എന്ന് വിളിക്കുന്ന രജിന്‍ (32), ചെന്തെങ്ങ് മധു എന്ന മധു (42), പത്താഴക്കാട് വടക്കെവീട്ടില്‍ സിയാദ് (34), പനങ്ങാട് അഞ്ചാം പരുത്തി തലക്കാട്ട് മിഥുന്‍ എന്ന കണ്ണന്‍ (25) എന്നിവരെയാണ് പ്രത്യേക അന്വേഷണ സംഘം അറസ്റ്റ് ചെയ്തത്.
കേസിലെ മൂന്നാം പ്രതി പെരിഞ്ഞനം പുഴങ്കരയില്ലത്ത് ഷഹീര്‍ (40) ഗള്‍ഫിലേക്ക് കടന്നതായി പൊലിസ് പറഞ്ഞു. ഇയാള്‍ക്ക് വേണ്ടി ലുക്ക് ഔട്ട് നോട്ടീസ് പുറപ്പെടുവിച്ചിട്ടുണ്ട്. നിയമസഭാ തെരഞ്ഞെടുപ്പ് ഫലം പ്രഖ്യാപിച്ച മെയ് 19 ന് എടവിലങ്ങ് സൊസൈറ്റി ബസ് സ്റ്റോപ്പില്‍ വെച്ചുണ്ടായ സംഘര്‍ഷത്തിലാണ് ബി.ജെ.പി പ്രവര്‍ത്തകനായ പ്രമോദിന് ഇഷ്ടിക കൊണ്ട് തലക്ക് അടിയേറ്റത്. സാരമായി പരുക്കേറ്റ പ്രമോദ് തൃശൂരിലെ സ്വകാര്യ ആശുപത്രിയില്‍ ചികിത്സയിലിരിക്കെ മരിക്കുകയായിരുന്നു.
പ്രമോദ് മരിച്ചതറിഞ്ഞ് ഒളിവില്‍ പോയ പ്രതികള്‍ കര്‍ണ്ണാടക, ആന്ധ്ര, തമിഴ്‌നാട് എന്നിവിടങ്ങളിലായി ഒളിവില്‍ കഴിയുകയായിരുന്നു. കേസന്വേഷണത്തിനായി റൂറല്‍ എസ്.പിക്ക് കീഴില്‍ രൂപീകരിച്ച പ്രത്യേക അന്വേഷണ സംഘം സൈബര്‍ സെല്ലിന്റെ സഹായത്തോടെ ബുധനാഴ്ച അര്‍ദ്ധ രാത്രി തൃപ്രയാറില്‍ വെച്ച് അറസ്റ്റ് ചെയ്യുകയായിരുന്നു.
ഡി.വൈ.എസ്.പി എസ്.ടി സുരേഷ് കുമാറിന് കീഴില്‍ സര്‍ക്കിള്‍ ഇന്‍സ്‌പെക്ടര്‍മാരായ സിബി ടോം, സുധീരന്‍, എസ്.ഐമാരായ ബി.രാജഗോപാല്‍, പി.കെ പത്മരാജന്‍, മാധവന്‍കുട്ടി, മുഹമ്മദ് റാഫി എന്നിവരടങ്ങിയ സംഘമാണ് പ്രതികളെ അറസ്റ്റ് ചെയ്തത്.