അമ്പലപ്പുഴ: വീട്ടമ്മയുടെ മാല മോഷ്ടിച്ച രണ്ട് നാടോടി സ്ത്രീകള്‍ അറസ്റ്റില്‍. ചെന്നൈ കുപ്പം സ്വദേശിനികളായ പാര്‍വ്വതി (55), അമ്മു (38) എന്നിവരാണ് അറസ്റ്റിലായത്.ഇന്നലെ ഉച്ചക്ക് 1-30 ഓടെ വണ്ടാനം പള്ളിമുക്ക് ജംഗ്ഷനിലായിരുന്നു സംഭവം. കരുമാടി മൂത്തേഴത്ത് മോഹനന്റെ ഭാര്യ മീനാക്ഷിയുടെ രണ്ടരപവന്‍ വരുന്ന സ്വര്‍ണമാലയാണ് നാടോടി സ്ത്രീകള്‍ മോഷ്ടിച്ചത്.ബസില്‍ നിന്നിറങ്ങി നടന്നു പോകുകയായിരുന്ന മീനാക്ഷിയുടെ മാല പിന്നാലെ ചെന്ന് ഇവര്‍ പൊട്ടിച്ചെടുക്കുകയായിരുന്നു. മീനാക്ഷിയുടെ ബഹളം കേട്ട് എത്തിയ നാട്ടുകാര്‍ ഇവരെ പിടികൂടി അമ്പലപ്പുഴ പോലീസിന് കൈമാറുകയായിരുന്നു. അമ്പലപ്പുഴ എസ് ഐ, പ്രജീഷ് കുമാറിന്റെ നേതൃത്വത്തിലുള്ള പോലീസ് സംഘം പ്രതികളെ കൂടുതല്‍ ചോദ്യം ചെയ്യലിനുശേഷം ഇന്ന് അമ്പലപ്പുഴ കോടതിയില്‍ ഹാജരാക്കും.