പാലക്കാട് : മലമ്പുഴ അകമലവാരത്തെ കല്ലേകുളങ്ങര ഏമൂര്‍ ഭഗവതി ക്ഷേത്രം പാട്ടത്തിനു നല്‍കിയ എലാക് എസ്റ്റേറ്റിലെ കോടികള്‍ വിലമതിക്കുന്ന ടാപ്പിങ് കഴിഞ്ഞ റബ്ബര്‍ മരങ്ങള്‍ മുറിച്ചു നീക്കുന്നു. ദേവസ്വം ബോര്‍ഡും, പാട്ടത്തിന് എടുത്ത സ്വകാര്യ വ്യക്തിയും തമ്മിലുള്ള കേസ് ഹൈകോടതിയില്‍ നിലനില്‍ക്കെയാണ് പാലക്കാട് ആര്‍.ഡി.ഒ നല്‍കിയ ഒരു ഉത്തരവിന്റെ മറവില്‍ 7000 ത്തോളം മരങ്ങള്‍ മുറിക്കാന്‍ നീക്കം ആരംഭിച്ചിട്ടുള്ളത്. ഇപ്പോള്‍ അഞ്ചു ലോഡ് മരങ്ങള്‍ മുറിച്ചു കടത്തി കഴിഞ്ഞു. വിവരമറിഞ്ഞു ദേവസ്വം ബോര്‍ഡ് ഉദ്യോഗസ്ഥര്‍ സ്ഥലത്തെത്തി തല്‍കാലം മരം മുറി തടഞ്ഞെങ്കിലും പ്രാദേശിക ജനങ്ങളുടെ പ്രതിഷേധം വകവെക്കാതെ വീണ്ടും മരങ്ങള്‍ മുറിക്കാന്‍ നീക്കം നടത്തിയത്.
കഴിഞ്ഞ മാസം പാലക്കാട് ആര്‍.ഡി.ഒ ആണ് മരങ്ങള്‍ മുറിക്കാന്‍ ഉത്തരവിട്ടത്. ഇതിനെതിരേ കല്ലേകുളങ്ങര ഏമൂര്‍ ഭഗവതി ക്ഷേത്രം മാനേജര്‍ ഹൈകോടതിയില്‍ ഹര്‍ജി നല്‍കിയിട്ടുണ്ട്. കോടതി തീരുമാനം ഉണ്ടാവുന്നതിനു മുന്‍പ് തന്നെ മരം മുറി തുടങ്ങി. മലമ്പുഴ ഡാമിന്റെ വൃഷ്ടി പ്രദേശത്തെ പ്രധാന ജലസ്രോതസായ മൈലാടി പുഴയും, കൊമ്പുതൂക്കി പുഴയിലും ഒഴുക്ക് ഉണ്ടാവുന്നത് അകമലവാരത്തെ ഈ എസ്റ്റേറ്റിലെ മരങ്ങള്‍ ഉള്ളതിനാലാണ്. ഇവിടത്തെ മരങ്ങള്‍ മുഴുവന്‍ വെട്ടി നീക്കുന്നതൊടെ ഈ രണ്ടു പുഴകളും ഇല്ലാതാവും. മലബാര്‍ സിമന്റ്‌സിലെ ഖനിയുടെ പ്രവര്‍ത്തനം മൂലം കാടു മുഴുവന്‍ വെട്ടി മാറ്റപ്പെട്ടതോടെ മലമ്പുഴയുടെ മുഖ്യ ജലസ്രോതസായ ഒന്നാം പുഴ ഇല്ലാതായി. ഇപ്പോള്‍ കുറച്ചെങ്കിലും വെള്ളം ഉള്ളത് മൈലാടിപുഴയിലാണ്.
1967ലാണ് കോട്ടയം സ്വദേശിക്ക് 30 വര്‍ഷത്തിന് 700 ഏക്കറോളം വരുന്ന എലാക് എസ്‌റ്റേറ്റ് പാട്ടത്തിനു നല്‍കിയത്. കൃഷി ചെയ്യാന്‍ മാത്രമായിരുന്നു കരാര്‍. എന്നാലിപ്പോള്‍ ഇവിടെ ടൂറിസവും മറ്റും നടത്തി വരുന്നുണ്ട്. 1997ല്‍ പാട്ടക്കാലാവധി കഴിഞ്ഞെങ്കിലും ഒഴിയാന്‍ തയ്യാറായില്ല. തുടര്‍ന്ന് പാലക്കാട് സബ്‌കോടതിയിലും, ജില്ലാ കോടതിയിലും ദേവസ്വത്തിന് അനുകൂലമായ വിധിയുണ്ടായി ജില്ലാകോടതിയില്‍ പാട്ടക്കാരന്‍ നല്‍കിയ കേസില്‍ ചമയങ്ങള്‍ക്കും മറ്റുമായി എട്ടര കോടി ദേവസ്വം നല്‍കാന്‍ കോടതി വിധിച്ചു.
ഈ വിധിയെ ചോദ്യം ചെയ്ത് ദേവസ്വം ബോര്‍ഡ് ഹൈകോടതിയില്‍ ഹര്‍ജിയും നല്‍കിയിട്ടുണ്ട്. ഇതൊന്നും നോക്കാതെയാണ് ആര്‍. ഡി.ഒ കോടതിയില്‍ നിന്നും മരങ്ങള്‍ മുറിക്കാന്‍ സ്വകാര്യ വ്യക്തി ഉത്തരവ് നേടിയെടുത്തത്. ഇതിനു പിന്നില്‍ ഭരണകഷിയുമായി ബന്ധപ്പെട്ട ഒരു രാഷ്ട്രീയ പാര്‍ട്ടിയുടെ കളിയുമുണ്ടെന്നു പ്രദേശ വാസികള്‍ ആരോപിക്കുന്നുണ്ട്.
റബ്ബര്‍ വെട്ടുന്നതുള്‍പ്പെടെ 75,000 മരങ്ങളും, കോടികള്‍ വിലമതിക്കുന്ന മറ്റു മരങ്ങളും ഇവിടെയുണ്ട്. ഇപ്പോള്‍ മുറിക്കാന്‍ ഉത്തരവ് നല്‍കിയിട്ടുള്ള 7000 മരങ്ങള്‍ക്കു മാത്രം അഞ്ച് കോടിയോളം വിലവരും. കോടതി വിധിവരും മുന്‍പ് കഴിയുന്നത്ര മരങ്ങള്‍ മുറിച്ച് പണമുണ്ടാക്കാനും അതിനു ശേഷം ദേവസ്വം ബോര്‍ഡില്‍ നിന്നും നഷ്ടപരിഹാരം വാങ്ങി ഒഴിഞ്ഞു പോവാനുമാണ് നീക്കം നടത്തുന്നത്.
എസ്റ്റേറ്റിലെ മുന്നൂറോളം ഏക്കര്‍ സ്ഥലം കരാറിന് വിരുദ്ധമായി കൈതച്ചക്ക കൃഷിക്കായി മറു പാട്ടത്തിനു നല്‍കിയിട്ടുണ്ട്. ഇവിടെ രാസവസ്തുക്കള്‍ ഉപയോഗിക്കുന്നതിനെതിരേ നാട്ടുകാര്‍ പ്രക്ഷോഭം നടത്തിയിരുന്നു. പഴയൊരു നിയമത്തിന്റെ പേരിലാണ് നഷ്ടപരിഹാരം നല്‍കാന്‍ ജില്ലാകോടതി വിധിയുണ്ടായിട്ടുള്ളതെന്നും എന്നാല്‍ സര്‍ക്കാര്‍ ഭൂമിയില്‍ നിന്നും ഒഴിഞ്ഞു പോവാന്‍ നഷ്ടപരിഹാരം നല്‍കേണ്ടതുണ്ടോ എന്ന് നിയമവിദഗ്ധരുമായി ചര്‍ച്ച നടത്തി വരികയാണെന്നും മലബാര്‍ ദേവസ്വം ബോര്‍ഡ് പ്രസിഡന്റ് ഒ.കെ. വാസു സുപ്രഭാതത്തോട് പറഞ്ഞു.
പാട്ടക്കാലാവധി കഴിഞ്ഞു ഇരുപത് വര്‍ഷമായി എസ്റ്റേറ്റ് ഇപ്പോഴും പാട്ടക്കാരന്‍ കൈവശം വച്ചു അനുഭവിച്ചു വരികയാണ്. ഇരുപത് വര്‍ഷം ബോര്‍ഡിന് ഒഴിഞ്ഞു തരാതെ കൈവശംവച്ചു ആദായം എടുത്തതിനു മാത്രം പത്തു കോടിയിലധികം വരുമാനം സ്വകാര്യ വ്യക്തി ഉണ്ടാക്കിയതായും ഇനി നഷ്ടപരിഹാരം എന്ന പ്രശ്‌നം ഉദിക്കുന്നില്ലെന്നും അദ്ദേഹം പറഞ്ഞു.