പാലാ : മദ്യപിച്ച് വാഹനമോടിച്ച് അപകടമുണ്ടാക്കിയ അഭിഭാഷകനെ പൊലിസ് പിടികൂടി. പാലാ ബാറിലെ അഭിഭാഷകന്‍ ജസ്റ്റിന്‍ ജോസഫ് കലയത്തിനാലിനെ (49) ആണ് അറസ്റ്റ് ചെയ്തത്. ഇന്നലെ ഉച്ചയോടെ പാലാ സ്റ്റേഡിയം ജംഗ്ഷനിലായിരുന്നു സംഭവം.
രണ്ട് സുഹൃത്തുക്കളോടൊപ്പം മദ്യപിച്ച് കാറിലെത്തിയ ജസ്റ്റിന്‍ ഒടിച്ചിരുന്ന കാര്‍ സെയില്‍സ് വാനിന്റെ പിന്നില്‍ ഇടിച്ച് കയറുകയായിരുന്നു. അപകടം ചോദ്യംചെയ്ത നാട്ടുകാര്‍ക്ക് നേരെ ഇയാള്‍ അസഭ്യവര്‍ഷം നടത്തുകയായിരുന്നു. നാട്ടുകാരും രോഷാകുലരായതോടെ ട്രാഫിക് ജോലിയിലുണ്ടായിരുന്ന ഉദ്യോഗസ്ഥന്‍ സ്റ്റേഷനില്‍ വിവരമറിയിക്കുകയായിരുന്നു.
തുടര്‍ന്ന് പൊലിസ് സ്ഥലത്തെത്തിയെങ്കിലും ജസ്റ്റിന്‍ അസഭ്യം പറയുന്നതും തട്ടിക്കയറുന്നതും തുടര്‍ന്നു. പൊലിസ് നടത്തിയ പരിശോധനയില്‍ ഇയാള്‍ അമിതമായി മദ്യപിച്ചിരുന്നതായി കണ്ടെത്തി. തുടര്‍ന്ന് കസ്റ്റഡിയിലെടുക്കുകയായിരുന്നു. മദ്യപിച്ച് വാഹനമോടിച്ച് അപകടമുണ്ടാക്കിയതിനാണ് കേസെടുത്തതെന്ന് സി.ഐ രാജന്‍ കെ. അരമന പറഞ്ഞു.