കണ്ണൂര്‍: ജില്ലാ ആശുപത്രി കെട്ടിടത്തിലെ ഒന്നാംനിലയില്‍ നിന്നു താഴെ വീണ് രണ്ടു വയസുകാരന് ഗുരുതരപരുക്ക്. കണ്ണാടിപ്പറമ്പിലെ ഹനീഫ-സഫീന ദമ്പതികളുടെ മകന്‍ ഫഹദ് ആണ് ഇന്നലെ രാവിലെ ആറോടെ ജില്ലാ ആശുപത്രി കെട്ടിടത്തിലെ കുട്ടികളുടെ വാര്‍ഡില്‍ നിന്നു താഴേക്കുവീണത്.
കീഴ്ത്താടിയില്‍ പരുക്കേറ്റ കുട്ടിയെ എ.കെ.ജി സഹകരണ ആശുപത്രിയില്‍ തീവ്രപരിചരണ വിഭാഗത്തില്‍ പ്രവേശിപ്പിച്ചു. കഴിഞ്ഞ രണ്ട് ദിവസമായി ജില്ലാ ആശുപത്രിയില്‍ ചികിത്സയിലായിരുന്നു കുട്ടി. പ്രഭാത ഭക്ഷണത്തിന് ശേഷം ഒന്നാം നിലയിലെ ശുചിമുറിക്ക് സമീപത്തെ ഇരിപ്പിടത്തില്‍ ഇരിക്കുകയായിരുന്ന കുട്ടി അബദ്ധത്തില്‍ താഴേക്ക് വീഴുകയായിരുന്നു. ഇവിടത്തെ ജനാലയില്‍ ഗ്രില്‍ ഘടിപ്പിച്ചിട്ടുണ്ടായിരുന്നില്ല. കുട്ടി താഴെയുള്ള ഷീറ്റില്‍ ഇടിച്ച് നിലത്തുവീഴുകയായിരുന്നു.