കോഴിക്കോട്: അല്‍ അജ്‌വ, മെഡ്‌ജോള്‍, അല്‍ അംബര്‍, അല്‍ ഖുദ്‌രി, അല്‍ മബ്‌റൂം, അല്‍ ശുക്‌രി, അല്‍ മറിയം, അല്‍ ബിദിയ തുടങ്ങിയ അപൂര്‍വ ശേഖരവുമായി ഈത്തപ്പഴമേള ആരംഭിച്ചു. കോഴിക്കോടന്‍സിന്റെ ആഭിമുഖ്യത്തില്‍ ഇന്‍ഡോര്‍ സ്റ്റേഡിയത്തില്‍ നടക്കുന്ന ഈത്തപ്പഴമേളയില്‍ ഈത്തപ്പഴം അച്ചാര്‍, ഈത്തപ്പഴപ്പായസം, ഈത്തപ്പഴഹല്‍വ, ഈത്തപ്പഴബിസ്‌കറ്റ്, ഈത്തപ്പഴക്കേക്ക് തുടങ്ങിയ ഇനങ്ങളുമുണ്ട്.
 20 രൂപ മുതല്‍ 5,250 രൂപ വരെയുള്ള ഈത്തപ്പഴങ്ങളും ഈത്തപ്പഴ ഉല്‍പന്നങ്ങളും വിപണിയിലുണ്ട്. വിശുദ്ധ ഈത്തപ്പഴം എന്നറിയപ്പെടുന്ന സഊദിയില്‍ നിന്നുള്ള അല്‍-അജ്‌വയ്ക്കാണ് ഏറ്റവും കൂടുതലല്‍ വില. 5,250 രൂപയാണ് കുങ്കുമം ചേര്‍ത്ത അല്‍ അജ്‌വയുടെ വില. സഊദിയില്‍ നിന്നും ഇറാനില്‍ നിന്നുമുള്ള ഈത്തപ്പഴങ്ങളാണ് മേളയിലധകവും. അച്ചാറിനും ബിസ്‌കറ്റിനും പായസത്തിനും 100 രൂപയും ഹല്‍വയ്ക്ക് 200 രൂപയുമാണ് വില. 20 മുതല്‍ 40 രൂപ വിലയുള്ള പ്രത്യേക ഇത്തപ്പഴക്കേക്കും മേളയിലുണ്ട്. രാവിലെ ഒന്‍പത് മുതല്‍ രാത്രി ഒന്‍പതു വരെ നടക്കുന്ന മേള ജൂണ്‍ 13 വരെ തുടരും. മേളയില്‍ നിന്നു ലഭിക്കുന്ന വരുമാനത്തിന്റെ ഒരു പങ്ക് പെയ്ന്‍ ആന്‍ഡ് പാലിയേറ്റീവ് കെയറിന് നല്‍കുമെന്നും സംഘാടകര്‍ പറഞ്ഞു.