കൊച്ചി: മത്സ്യഫെഡിന്റെ ഞാറയ്ക്കല്‍ ഫിഷ് ഫാമിലെ ജല വിനോദ സഞ്ചാര കേന്ദ്രത്തില്‍ ഇനിമുതല്‍ വാട്ടര്‍ സൈക്കിളും. വിദേശ ടൂറിസം മേഖലയില്‍ ജനപ്രിയമായ വാട്ടര്‍ സൈക്കിള്‍ സംസ്ഥാനത്ത് ഇതാദ്യമായാണ് ഒരു ജലവിനോദ സഞ്ചാര കേന്ദ്രത്തില്‍ അവതരിപ്പിക്കുന്നത്.
വാട്ടര്‍ സൈക്കിളിങ് കൂടാതെ കയാക്കിങും ഈ വിഷുവിന് ഉദ്ഘാടനം ചെയ്യും. ഏപ്രില്‍ 14ന് രാവിലെ 11.30ന് മത്സ്യഫെഡ് ചെയര്‍മാന്‍ പി.പി ചിത്തരഞ്ജന്‍ വാട്ടര്‍ സൈക്കിളങും കയാക്കിങും ഫ്‌ളാഗ് ഓഫ് ചെയ്യും.
വാട്ടര്‍ സൈക്കിളിങ്് അര മണിക്കൂര്‍ നേരത്തേക്ക് 200 രൂപയാണ് ചാര്‍ജ്. വിഷു ദിനമായ ഏപ്രില്‍ 15ന് മാത്രം ടിക്കറ്റ് നിരക്കില്‍ പ്രത്യേക ഇളവായി 100 രൂപ അനുവദിക്കും. അരമണിക്കൂര്‍ നേരത്തെ കയാക്കിംഗിന് 150 രൂപയാണ് ചാര്‍ജ്. സൈക്കിള്‍ മാതൃകയിലുള്ള വാട്ടര്‍ സൈക്കിളിന് 12 അടി നീളവും ആറ് അടി വീതിയും നാല് അടി ഉയരവുമുണ്ട്. ഹള്ളുകള്‍ ഫൈബറിലും ഫ്രയിം സ്റ്റീലിലുമാണ് നിര്‍മിച്ചിരിക്കുന്നത്. ഇരുവശങ്ങളിലും പ്രൊപ്പല്ലറുകള്‍ ഘടിപ്പിച്ചിട്ടുണ്ട്. വെയില്‍ ഏല്‍ക്കാതിരിക്കാന്‍ ടോപ്പ് കവര്‍ സൗകര്യവും ഒരുക്കിയിട്ടുണ്ട്.
ഷിപ്പ് മെക്കാനിക്കായ ഉദയംപേരൂര്‍ സ്വദേശി വെന്‍സി ആന്റണിയുടെയും മത്സ്യഫെഡിന്റെയും സംയുക്ത സംരംഭമാണിത്. സിഫ്റ്റിലെ പ്രിന്‍സിപ്പല്‍ സയന്റിസ്റ്റും നേവല്‍ ആര്‍ക്കിടെക്റ്റുമായ ഡോ. എം.വി ബൈജുവാണ് ഈ സംരംഭത്തിന് സാങ്കേതിക സഹായം നല്‍കിയത്. വെന്‍സി ആന്റണിയെയും സുരക്ഷാ സര്‍ട്ടിഫിക്കറ്റ് നല്‍കിയ സിഫ്റ്റിലെ എം.വി ബൈജുവിനെയും ഉദ്ഘാടന വേളയില്‍ ആദരിക്കും.