മനില: റോഹിംഗ്യ കൂട്ടക്കൊല പരാമര്‍ശത്തിന്റെ പേരില്‍ മ്യാന്മര്‍ നേതാവ് ആങ് സാന്‍ സൂകിയോട് ഫിലിപ്പൈന്‍സ് പ്രസിഡന്റ് റോഡ്രിഗോ ഡ്യുറ്റെര്‍റ്റെ മാപ്പ് പറഞ്ഞു.
കഴിഞ്ഞയാഴ്ചയാണ് ഇത്തരമൊരു പരാമര്‍ശം ഡ്യുറ്റെര്‍റ്റെ നടത്തിയത്. മ്യാന്മര്‍ കൂട്ടക്കൊലയുടെ ഇരകളായ റോഹിംഗ്യകള്‍ക്ക് അഭയം നല്‍കാന്‍ തങ്ങള്‍ ഒരുക്കമാണെന്നായിരുന്നു അദ്ദേഹം പറഞ്ഞത്.
എന്നാല്‍, ഡ്യുറ്റെര്‍റ്റെയുടെ പരാമര്‍ശം അപലപനീയമാണെന്നും അദ്ദേഹത്തിന് മ്യാന്മറിനെ കുറിച്ച് ഒന്നുമറിയില്ലെന്നും സൂകിയുടെ വക്താവ് ഇതിനോട് പ്രതികരിച്ചിരുന്നു. ഇതേ തുടര്‍ന്നാണു മാപ്പപേക്ഷയുമായി അദ്ദേഹം രംഗത്തെത്തിയത്. മ്യാന്മറിന്റെ ആഭ്യന്തരയുദ്ധത്തില്‍ ഇടപെടുകയായിരുന്നില്ല താനെന്നും പരാമര്‍ശത്തില്‍ ഖേദം പ്രകടിപ്പിക്കുന്നതായും ഡ്യുറ്റെര്‍റ്റെ കഴിഞ്ഞ ദിവസം വ്യക്തമാക്കി.
തെക്കുകിഴക്കന്‍ ഏഷ്യന്‍ രാജ്യങ്ങളുടെ കൂട്ടായ്മയായ ആസിയാനില്‍ അംഗങ്ങളാണ് മ്യാന്മറും ഫിലിപ്പൈന്‍സും.