പട്ടാമ്പി: തിരുവേഗപ്പുറ വിളത്തൂര്‍ സ്വദേശി എം മാധവ(68)ന്് ഇന്ത്യന്‍ യോഗാ ഫെഡറേഷന്‍ ഹരിയാനയിലെ ഫരിദാബാദില്‍ സംഘടിപ്പിച്ച ദേശീയ യോഗാഭ്യാസ മത്സരത്തില്‍ ഒന്നാം സ്ഥാനവും സ്വര്‍ണ മെഡലും ലഭിച്ചു. 60 വയസ്സിനു മുകളില്‍ ഉള്ളവരുടെ ഗ്രൂപ്പിലാണ് ഈ നേട്ടം. ഏപ്രില്‍ ആദ്യവാരത്തിലാണ് മത്സരം നടന്നത്.
ഇന്ത്യയിലെ വിവിധ സംസ്ഥാനങ്ങളില്‍ നിന്നായി വിവിധ പ്രായത്തിലുള്ളവര്‍ മത്സര ഇനങ്ങളില്‍ പങ്കെടുത്തു. ഇന്ത്യന്‍ യോഗാ ഫെഡറേഷന്‍ കഴിഞ്ഞ 36 വര്‍ഷമായി എല്ലാ വര്‍ഷവും സംഘടിപ്പിച്ചു വരുന്ന യോഗാസന മത്സരങ്ങളില്‍ ആദ്യമായാണ് ഒരു മലയാളി ഒന്നാം സ്ഥാനത്തിനര്‍ഹനാകുന്നത്. ആരോഗ്യ സംരക്ഷണത്തിനും പ്രതിരോധശേഷിക്കും അത്യധികം ഉപകരിക്കുന്ന ലളിതമായ യോഗ പരിശീലനം മത്സരയിനത്തിലുള്‍പ്പെടുത്തി വില കുറക്കാനാവില്ലെന്ന അഭിപ്രായമാണ് അദ്ദേഹത്തിനുള്ളത്.
എങ്കിലും ഭാരതത്തിന്റെ പരിപാവനമായ യോഗാസന്ദേശം സാധാരണക്കാരിലെത്തിക്കുന്നതിനും, ശാസ്ത്രിയമായ യോഗ പരിശീലനം ജനങ്ങള്‍ക്ക് നേരില്‍ കണ്ടാസ്വദിക്കുന്നതിനും സര്‍വ്വോപരി സ്വന്തം പരിമിതികള്‍ സ്വയം മനസ്സിലാക്കുന്നതിനും ഇത്തരം മത്സര പരിപാടികള്‍ ഏറെ സഹായമാകുമെന്ന് അദ്ദേഹം കരുതുന്നു. പാരമ്പര്യ കര്‍ഷക കുടുംബത്തില്‍ ജനിച്ച മാധവന്‍ ഇരുപതാം വയസിലാണ് യോഗ പരിശീലനം തുടങ്ങിയത്.
കഴിഞ്ഞ 20 വര്‍ഷക്കാലമായി യോഗാ വിദ്യാരംഗത്ത് അധ്യാപകനായി സജീവമായി പ്രവര്‍ത്തിച്ചു വരുന്ന എം.മാധവന് സംസ്ഥാനത്ത് നിരവധി ശിഷ്യ സമ്പത്തുണ്ട്. സുപ്രസിദ്ധ യോഗാചാര്യനായിരുന്ന ടി.ജി.ചിദംബരത്തിന്റെ പ്രധാന ശിഷ്യരിലൊരാളും എറണാംകുളം യോഗ ദീപ്തയിലെ മുഖ്യ യോഗാചാര്യനുമാണ് അദ്ദേഹം.
മാധവന്‍ ചെമ്പ്രയെന്ന പേരില്‍ പത്രങ്ങളിലും മറ്റു ആനുകാലികങ്ങളിലും വിമര്‍ശനങ്ങളും പ്രതികരണങ്ങളും എഴുതാറുണ്ട്. കൊല്‍ക്കത്തയില്‍ നടന്ന യോഗ നാച്വറോപ്പതി ദേശീയ ശില്പശാലയില്‍ പങ്കെടുത്ത് പുരസ്‌ക്കാരം നേടിയിട്ടുണ്ട്. തിരുവേഗപ്പുറ ഗ്രാമ പഞ്ചായത്ത് സ്‌നേഹാദരവ് പുരസ്‌ക്കാരം നല്‍കി ആദരിച്ചിരുന്നു. പാലക്കാട് ജില്ലാ നവോത്ഥാന വേദിയും ചെമ്പ്ര യുവജന സംഘം വായനശാലയും സംയുക്തമായി സംഘടിപ്പിച്ച ആദരണീയ പുരസ്‌ക്കാരം, തിരുന്നാവായ മാമാങ്ക മഹോത്സവ ട്രോഫി, 2016 ല്‍ പാലക്കാട്ടു നടന്ന ജില്ല സംസ്ഥാന യോഗാസന മത്സരങ്ങളില്‍ ഒന്നാം സ്ഥാനങ്ങള്‍, 2017-ല്‍ തമിഴ്‌നാട് തിരുച്ചംകോട് കെ.എസ്.ആര്‍. എഡുക്കേഷനല്‍ ഇന്‍സ്റ്റിട്യൂട്ടില്‍ നടന്ന ദേശീയ യോഗാസന മത്സരത്തില്‍ മെഡല്‍ നേടിയതുള്‍പ്പെടെ നിരവധി അംഗീകാരങ്ങള്‍ ലഭിച്ചിട്ടുണ്ട്.
യോഗാ വിദ്യാരംഗത്ത് തനിക്കു ലഭിച്ചിട്ടുള്ള നേട്ടങ്ങള്‍ക്കെല്ലാം കാരണം ഗുരുക്കന്മാരുടെ അനുഗ്രഹവും ശിഷ്യരുടെ പ്രാര്‍ത്ഥനയുമാണെന്ന് അദ്ദേഹം ഉറച്ചു വിശ്വസിക്കുന്നു. തിരുവേഗപ്പുറ വിളത്തൂര്‍ പുത്തൂര്‍ വീട്ടില്‍ യോഗയും, കൃഷിയും, എഴുത്തും വായനയുമായി കഴിഞ്ഞു വരുന്നതിനിടക്കാണ് പുതിയ നേട്ടം കൊയ്തത്. പ്രായത്തിന്റെ അവശതകളൊന്നും ബാധിക്കാതെ മാധവന്‍ ഇന്നും കര്‍മനിരതനാണ്. യോഗക്കു വേണ്ടി ജീവിതം സമര്‍പ്പിക്കലാണ് തന്റെ നിയോഗമെന്നും മാധവന്‍ കരുതുന്നു. ഭാാര്യ: ശാന്തകുമാരി. ബാബു, ജയ തങ്ക മോഹനന്‍, പ്രീത എന്നിവരാണ് മക്കള്‍. മകള്‍ ജയ തങ്ക മോഹനന്‍ യോഗ ടീച്ചറാണ്.