മുംബൈ: ഇന്ത്യന്‍ ക്രിക്കറ്റ് താരങ്ങളുടെ പ്രകടന നിലവാരം മെച്ചപ്പെടുത്തുക ലക്ഷ്യമിട്ട് ബി.സി.സി.ഐ. താരങ്ങള്‍ക്ക് അമിത ജോലി ഭാരം അവരുടെ ഫിറ്റ്‌നസിനേയും പ്രകടനത്തേയും ബാധിക്കുന്നത് തടയാന്‍ ജി.പി.എസ് ചിപ്പ് സംവിധാനം ഏര്‍പ്പെടുത്താന്‍ ബി.സി.സി.ഐ ആലോചിക്കുന്നു. പരുക്കും ജോലി ഭാരവും കാരണം താരങ്ങള്‍ അവശരാകുന്നത് കണക്കിലെടുത്താണ് ബി.സി.സി.ഐ പരിഹാരമെന്ന നിലയില്‍ പുതിയ പദ്ധതി കൊണ്ടുവരാന്‍ ആലോചിക്കുന്നത്.
താരങ്ങളുടെ ഊര്‍ജ നിലവാരവും ഫിറ്റ്‌നസും അറിയാന്‍ ഉപയോഗിക്കുന്നതാണ് ജി.പി.എസ് ചിപ്പുകള്‍. ചിപ്പുകള്‍ വഴി താരങ്ങളുടെ ജോലി ഭാരത്തിന്റെ തോതും അവരുടെ ആരോഗ്യവും സംബന്ധിച്ച വിവരങ്ങളും റണ്ണിങിലെ വേഗത സംബന്ധിച്ചും അപ്പോള്‍ വിവരങ്ങള്‍ ലഭിക്കും. താരങ്ങള്‍ കളിക്കാനിറങ്ങുമ്പോള്‍ അവരുടെ വസ്ത്രത്തില്‍ ചിപ്പ് ഘടിപ്പിക്കുന്ന തരത്തിലാണ് പദ്ധതി വിഭാവനം ചെയ്തിരിക്കുന്നത്. ബി.സി.സി.ഐ പദ്ധതി നടപ്പിലാക്കിയാല്‍ സംവിധാനം ഉപയോഗപ്പെടുത്തുന്ന രണ്ടാമത്തെ ടീമായി ഇന്ത്യ മാറും. നേരത്തെ ആസ്‌ത്രേലിയന്‍ ക്രിക്കറ്റ് ബോര്‍ഡ് ഈ സംവിധാനം ഉപയോഗപ്പെടുത്തിയിരുന്നു. ഇന്ത്യന്‍ ഹോക്കി ടീമും ഈ പദ്ധതി വിജയകരമായി നടപ്പിലാക്കിയിരുന്നു.
നിലവില്‍ താരങ്ങളുടെ ജോലി ഭാരം സംബന്ധിച്ച് വ്യാപക പരാതി ഉയര്‍ന്ന സാഹചര്യത്തിലാണ് ബി.സി.സി.ഐ സാങ്കേതിക വിദ്യ ഉപയോഗിക്കാനുള്ള ശ്രമം തുടങ്ങിയത്.
ഇന്ത്യന്‍ ഹോക്കി ടീമിന് പുറമേ ഇന്ത്യന്‍ ഫുട്‌ബോള്‍ ടീമും ഈ പദ്ധതി ഭാഗികമായി നടപ്പിലാക്കിയിട്ടുണ്ട്. ടീമിന്റെ പരിശീലന സമയത്ത് ചിപ്പ് ഉപയോഗിച്ച് താരങ്ങളുടെ പ്രകടന നിലവാരം പരിശോധിക്കുകയാണ് ഫുട്‌ബോള്‍ ടീം ചെയ്യുന്നത്. ഐ.പി.എല്‍ സീസണ്‍ അവസാനിച്ചാല്‍ ഇന്ത്യ ജൂലൈ മുതല്‍ 2019 ജനുവരി വരെയുള്ള കാലയളവില്‍ 13ഓളം ടെസ്റ്റ് മത്സരങ്ങള്‍ കളിക്കാനൊരുങ്ങുകയാണ്.