കൊച്ചി: തൃശൂര്‍ കേരള വര്‍മ കോളജിലെ വനിതാ ഹോസ്റ്റലില്‍ സമയക്രമത്തിലടക്കം നിയന്ത്രണം ഏര്‍പ്പെടുത്തിയതിനെതിരായ ഹരജി ഹൈക്കോടതി മധ്യവേനലവധിക്കുശേഷം പരിഗണിക്കാനായി മാറ്റി. തിങ്കള്‍,ബുധന്‍,വെള്ളി ദിവസങ്ങളില്‍ വിദ്യാര്‍ഥിനികള്‍ വൈകിട്ട് 4.30നും ചൊവ്വ, വ്യാഴം, ശനി ദിവസങ്ങളില്‍ ആറ് മണിക്കും ഹോസ്റ്റലില്‍ എത്തിയിരിക്കണമെന്നാണ് വ്യവസ്ഥ. ശനിയാഴ്ചകളില്‍ പുറത്തു പോകാനുള്ള സമയം വൈകിട്ട് 3.30 മുതല്‍ ആറുവരെയാണ്. കടുത്ത സമയ നിയന്ത്രണം നിമിത്തം കോളജ് ലൈബ്രറിയടക്കമുള്ള സൗകര്യം ഉപയോഗിക്കാനാവാത്ത സ്ഥിതിയുണ്ടെന്നും കോളജിലെ കലാ-കായിക പരിപാടികളിലടക്കം പങ്കെടുക്കാന്‍ കഴിയാത്ത സ്ഥിതിയുണ്ടെന്നും ഹരജിയില്‍ പറയുന്നു.
ഹോസ്റ്റലില്‍ കഴിയുന്നവര്‍ രാഷ്ട്രീയ യോഗങ്ങളിലോ ജാഥകളിലോ പങ്കെടുക്കരുതെന്നും വ്യവസ്ഥയുണ്ട്. ഇതു മൗലികാവകാശ ലംഘനമാണെന്നും ഹരജിയില്‍ ആരോപിക്കുന്നു. ബി.എ വിദ്യാര്‍ഥിനിയും മാനന്തവാടി സ്വദേശിനിയുമായ അഞ്ജിത കെ. ജോസാണ് ഹരജി നല്‍കിയത്.