ന്യൂഡല്‍ഹി: റിയോ ഒളിംപിക്‌സ് ഗുസ്തി മത്സരത്തില്‍ പങ്കെടുക്കാന്‍ ഇന്ത്യന്‍ താരത്തെ തെരഞ്ഞെടുക്കുന്നതിന് ട്രയല്‍സ് നടത്തണമെന്ന് ആവശ്യപ്പെട്ട് ഗുസ്തി താരം സുശീല്‍ കുമാര്‍ സമര്‍പ്പിച്ച ഹരജി ഡല്‍ഹി ഹൈക്കോടതി തള്ളി. റെസലിംഗ് ഫെഡറേഷന്റെ തീരുമാനത്തില്‍ ഇടപെടാനാകില്ലെന്നും ഹൈക്കോടതി വ്യക്തമാക്കി. ജസ്റ്റിസ് മന്‍മോഹന്‍ അധ്യക്ഷനായ ബെഞ്ചാണ് ഹരജി പരിഗണിച്ചത്.

ഒളിംപിക്‌സ് അടുത്തിരിക്കുന്ന സാഹചര്യത്തില്‍ ട്രയല്‍സ് നടത്തുന്നത് കായികതാരത്തിന്റെ ആരോഗ്യത്തെ ബാധിക്കുമെന്നും പരുക്കുകള്‍ ഉണ്ടാവാന്‍ കാരണമാകുമെന്നും കോടതി നിരീക്ഷിച്ചു.

ഒളിംപിക് മെഡല്‍ ജേതാവായ സുശീല്‍ കുമാറിനെ മറികടന്ന് നര്‍സിംഗ് യാദവിനേയാണ് ഇന്ത്യന്‍ റെസലിംഗ് ഫെഡറേഷന്‍ റിയോ ഒളിംപിക്‌സിനയക്കുന്നത്. ഇതോടെ സുശീല്‍കുമാറിന് ഒളിംപിക്‌സില്‍ പങ്കെടുക്കാനുള്ള സാധ്യതകള്‍ മങ്ങിയിരിക്കുകയാണ്.