ആറ്റിങ്ങല്‍: ഇന്ത്യയില്‍ സമ്പൂര്‍ണ ആംബുലന്‍സ് സേവനമുള്ള ഏക മണ്ഡലമായി ആറ്റിങ്ങല്‍. ഡോ. എ. സമ്പത്ത് എം.പിയുടെ പ്രാദേശിക വികസന ഫണ്ടില്‍ നിന്നും മൂന്നാം ഘട്ടമായി അനുവദിച്ച പതിനൊന്ന് എ.സി. മള്‍ട്ടി ആംബുലന്‍സുകളുടെ ഫ്‌ളാഗ് ഓഫും സമ്പൂര്‍ണ ആംബുലന്‍സ് സേവന മണ്ഡല പ്രഖ്യാപനവും മുഖ്യമന്ത്രി പിണറായി വിജയന്‍ ഇന്ന് നിര്‍വഹിക്കും.
വെള്ളനാട്, അഞ്ചുതെങ്ങ്, ഇടവ, ആനാട്, പനവൂര്‍ നാവായിക്കുളം, വിളവൂര്‍ക്കല്‍, പുളിമാത്ത്, വാമനപുരം, മലയിന്‍കീഴ്, അരുവിക്കര തുടങ്ങിയ പഞ്ചായത്ത് അധ്യക്ഷ•മുഖ്യമന്ത്രിയില്‍ നിന്നും ആംബുലന്‍സുകള്‍ ഏറ്റുവാങ്ങും.
വൈകുന്നേരം അഞ്ചിന് അരുവിക്കര ഡാം സൈറ്റില്‍ നടക്കുന്ന പരിപാടിയില്‍ സഹകരണ വകുപ്പുമന്ത്രി കടകംപള്ളി സുരേന്ദ്രന്‍ അധ്യക്ഷനാകും. ഡോ. എ. സമ്പത്ത് എം.പി. ആമുഖപ്രസംഗവും ഡെപ്യൂട്ടി സ്പീക്കര്‍ വി. ശശി മുഖ്യപ്രഭാഷണവും നടത്തും.
എം.എല്‍.എമാരായ സി. ദിവാകരന്‍, ബി. സത്യന്‍, ഡി.കെ. മുരളി, ഐ.ബി. സതീഷ്, വി. ജോയി, കെ. ശബരിനാഥന്‍, ജില്ലാ പഞ്ചായത്ത് പ്രസിഡന്റ് വി.കെ മധു, നായനാര്‍ ചാരിറ്റബിള്‍ ട്രസ്റ്റ് ചെയര്‍മാന്‍ ആനാവൂര്‍ നാഗപ്പന്‍, നെടുമങ്ങാട് ബ്ലോക്ക് പഞ്ചായത്ത് പ്രസിഡന്റ് ബി. ബിജു ആശംസാപ്രസംഗം നടത്തും.
വിവിധ തദ്ദേശ സ്വയംഭരണ സ്ഥാപന പ്രതിനിധികള്‍, ഉദ്യോഗസ്ഥര്‍ തുടങ്ങിയവരും ചടങ്ങില്‍ സംബന്ധിക്കും. തുടര്‍ന്ന് പാലിയേറ്റീവ്, ആരോഗ്യ പ്രവര്‍ത്തകരെ ആദരിക്കും.