തിരുവനന്തപുരം: കേരളാ വ്യാപാരി വ്യവസായി സംസ്ഥാന സമ്മേളനത്തിന്റെ സമാപന സമ്മേളനം ഉദ്ഘാടനം ചെയ്യുന്നതിന് മുഖ്യമന്ത്രി കൃത്യസമയത്ത് എത്തിയെങ്കിലും സംഘാടകരെത്തിയില്ല. തുടര്‍ന്ന് സമ്മേളനത്തില്‍ പങ്കെടുക്കാതെ മുഖ്യമന്ത്രി മടങ്ങി. ഇന്നലെ വൈകുന്നേരം 5.30 ആയിരുന്നു സമാപന പൊതുസമ്മേളനത്തിന്റെ ഉദ്ഘാടനത്തിന് നിശ്ചയിച്ചിരുന്നത്. കൃത്യനിഷ്ഠയിലെ തന്റെ പതിവു തെറ്റിക്കാതെ മുഖ്യമന്ത്രി അഞ്ചരക്ക് തന്നെ എത്തി.
മുഖ്യമന്ത്രിയെത്തുമ്പോള്‍ സമ്മേളനത്തിനു മുന്‍പായി നിശ്ചയിച്ചിരുന്ന റാലി പകുതി ദൂരം പിന്നിട്ടിട്ടേ ഉണ്ടായിരുന്നുള്ളൂ. മുഖ്യമന്ത്രിയെ സ്വീകരിക്കാന്‍ സമാപന വേദിയായ പുത്തരിക്കണ്ടം മൈതാനിയില്‍ സംഘാടകരും ഇല്ലായിരുന്നു. സംഘാടകര്‍ റാലിക്കൊപ്പമായിരുന്നതാണ് അബദ്ധമായത്. തുടര്‍ന്ന് അല്‍പനേരം അവിടെ ചിലവഴിച്ച മുഖ്യമന്ത്രി നിശാഗന്ധി നൃത്തോത്സവം ഉദ്ഘാടനം ചെയ്യുന്നതിനായി പോയി. ആറു മണിക്കായിരുന്നു അവിടെ ഉദ്ഘാടനം നിശ്ചയിച്ചിരുന്നത്. അവിടെ നിശ്ചയിച്ചതിലും നേരത്തെ മുഖ്യമന്ത്രി വേദിയില്‍ എത്തിയതോടെ സംഘാടകര്‍ അമ്പരന്നു. പരിപാടിയുടെ ഉദ്ഘാടന വേദിയില്‍ കയറാതെ മുഖ്യമന്ത്രി കാണികളുടെ സീറ്റിലിരുന്ന് സമയം കഴിച്ചു. പിന്നീട് കൃത്യം ആറുമണിക്ക് തന്നെ പരിപാടിയുടെ ഉദ്ഘാടനം നിര്‍വ്വഹിച്ച് മുഖ്യമന്ത്രി മടങ്ങുകയും ചെയ്തു.നിശാഗന്ധിയിലെ പരിപാടിക്ക് ശേഷം വ്യാപാരി വ്യവസായി സമിതിയുടെ പരിപാടിയില്‍ മുഖ്യമന്ത്രി പങ്കെടുക്കുമെന്ന് സി.പി.എം കേന്ദ്രകമ്മിറ്റി അംഗം എം.വി. ഗോവിന്ദന്‍ ഉള്‍പ്പടെയുള്ളവര്‍ സദസിനെ അറിയിച്ചുവെങ്കിലും അതുണ്ടായില്ല.