നീലേശ്വരം: ദീര്‍ഘദൂര സര്‍വിസ് നടത്തുന്ന സ്വകാര്യ ബസുകളില്‍ പലതും നീലേശ്വരം ബസ് സ്റ്റാന്‍ഡില്‍ കയറാത്തതു യാത്രക്കാരെ വലയ്ക്കുന്നു. പ്രധാനമായും രാവിലെയും വൈകുന്നേരവുമാണ് ഇത്തരത്തില്‍ ബസുകള്‍ സ്റ്റാന്‍ഡില്‍ കയറാതെ സര്‍വിസ് നടത്തുന്നത്. മുന്‍പു പരാതി ഉയര്‍ന്നപ്പോള്‍ സര്‍വിസ് സാധാരണ നിലയിലായിരുന്നെങ്കിലും വണ്‍വേ സംവിധാനം ഇല്ലാതെയായതോടെ സ്റ്റാന്‍ഡില്‍ കയറാതെ പോകുന്ന സ്ഥിതി ആവര്‍ത്തിക്കുകയായിരുന്നു.
ബസ് സ്റ്റാന്‍ഡിലേക്കു ടിക്കറ്റെടുക്കുന്ന യാത്രക്കാരെ മാര്‍ക്കറ്റ് ജങ്ഷനില്‍ ഇറക്കിവിടുകയാണു പതിവ്. സ്ത്രീകളും കുട്ടികളുമുള്‍പ്പെടെയുള്ളവരെ ഇത്തരത്തില്‍ നിരവധി തവണ ഇറക്കിവിട്ടിട്ടുണ്ട്.
ഇറങ്ങാന്‍ വിസമ്മതിച്ചവരെ തള്ളിയിട്ട സംഭവവുമുണ്ടായിട്ടുണ്ട്. ഇതു ചോദ്യം ചെയ്യുന്നവരോട് ജീവനക്കാര്‍ അപമര്യാദയായി പെരുമാറുന്നതായും പരാതിയുണ്ട്. പരാതി നല്‍കിയാലും ഇവര്‍ക്കെതിരേ അധികൃതര്‍ നടപടിയൊന്നും കൈക്കൊള്ളാറില്ലെന്നാണു യാത്രക്കാര്‍ പറയുന്നത്. തങ്ങള്‍ക്കു ബസ് സ്റ്റാന്‍ഡില്‍ കയറാതെ ദേശീയപാത വഴി സര്‍വിസ് നടത്താനുള്ള അനുമതിയുണ്ടെന്നാണു സ്വകാര്യബസ് ജീവനക്കാരുടെ വാദം. ഫാസ്റ്റ് പാസഞ്ചര്‍, ലിമിറ്റഡ് സ്റ്റോപ് ബസുകളാണ് ഇത്തരത്തില്‍ ഏറെയും സര്‍വിസ് നടത്തുന്നത്.
അതേസമയം ബസ് സ്റ്റാന്‍ഡില്‍ കയറാതെ സര്‍വിസ് നടത്താന്‍ ബസുകള്‍ക്കു അനുമതി നല്‍കിയിട്ടില്ലെന്നു റോഡ് ട്രാന്‍സ്‌പോര്‍ട്ട് അധികൃതര്‍ പറഞ്ഞു. സ്റ്റാന്‍ഡില്‍ കയറാതെ പോകുന്ന ബസുകള്‍ക്കെതിരേ പരാതി ലഭിച്ചാല്‍ നിയമാനുസൃതമായ നടപടികള്‍ കൈക്കൊള്ളുമെന്നും അധികൃതര്‍ വ്യക്തമാക്കി.