വണ്ടൂര്‍: റോഡില്‍ പൊലിസ് പരിശോധന നടക്കുന്നുണ്ടെന്ന് സിഗ്‌നല്‍ നല്‍കുന്നവര്‍ക്കെതിരെയുള്ള പൊലിസുകാരന്റെ വിഡിയോ സമൂഹ മാധ്യമങ്ങളില്‍ വൈറലാകുന്നു. മലപ്പുറം ട്രാഫിക്കിലെ പൊലിസുകാരനായ ഫിലിപ്പ് മമ്പാടിന്റെ വാക്കുകളാണ് ജനങ്ങള്‍ ഏറ്റെടുത്തിരിക്കുന്നത്.
നിലവില്‍ കൊച്ചി ടെക്‌നോപാര്‍ക്കിലെ എസ്.ഐയായ അമൃതരംഗന്‍ പൂക്കോട്ടുംപാടത്ത് എസ്. ഐ ആയിരുന്ന കാലത്തെ ഒരു സംഭവവുമായി ബന്ധപ്പെട്ടാണ് ഇപ്പോള്‍ വിഡിയോ പോസ്റ്റ് ചെയ്തിരിക്കുന്നത്. മലയോര മേഖലയിലെ കരുവാരകുണ്ട്, കാളികാവ്, പൂക്കോട്ടംപാടം, വണ്ടൂര്‍ പ്രദേശങ്ങളെ കേന്ദ്രീകരിച്ച് കഞ്ചാവ് വില്‍പന സജീവമാണ്. മദ്യത്തിന്റെ വില വര്‍ധിച്ചതും, ലഭ്യത കുറ്റവുമാണ് കഞ്ചാവിന് ആവശ്യക്കാര്‍ ഏറാന്‍ കാരണം. ഉപയോഗിക്കുന്നവരും, വില്‍പ്പന നടത്തുന്നവരും അധികവും യുവാക്കളാണ്. ഇതില്‍ ചെറിയൊരു ശതമാനം മാത്രമാണ് പിടിക്കപ്പെടുന്നത്. ഇത്തരം സംഘങ്ങളെ വാഹന പരിശോധന വഴിയാണ് പൊലിസ് പിടികൂടാറ് . ഇത്തരം സന്ദര്‍ഭങ്ങളിലാണ് സിഗ്‌നല്‍ നല്‍കുക വഴി കുറ്റവാളികള്‍ രക്ഷപ്പെടുന്നതെന്നാണ് പോസ്റ്റ് ചെയ്തിരിക്കുന്നത്. അറിയിപ്പ് നല്‍കി രക്ഷപ്പെടുത്തുന്നതിന് പകരം ഇത്തരക്കാരെ അധികൃതര്‍ക്ക് മുന്നില്‍ ചൂണ്ടിക്കാണിച്ചു തന്നാല്‍ മാത്രമേ ലഹരിയുടെ ഉപയോഗം കുറക്കാനാകൂവെന്നും അദ്ദേഹം പറയുന്നു. ഫിലിപ്പ് പ്രദേശത്തെ സ്‌കൂളുകളില്‍ ലഹരിക്കെതിരെയുള്ള ബോധ വല്‍ക്കരണ ക്ലാസുകള്‍ നയിക്കുന്നതിലും മുന്‍പന്തിയിലാണ്.