അണ്ടത്തോട്: പ്രദേശവാസികളുടെ നിത്യജീവിതത്തിന് ഉപയോപ്രദമായിരുന്ന പുഞ്ചകുളങ്ങള്‍ നാശത്തിലേക്ക്. കൃഷിവകുപ്പിന്റേയും പഞ്ചായത്ത് അധികാരികളുടെയും മൗനത്തില്‍ പ്രതിഷേധിച്ചു നാട്ടുകാര്‍. പണ്ട് കാലങ്ങളില്‍ നെല്‍ വയലുകളിലേക്ക് പുഞ്ച കൃഷി സീസണില്‍ മോട്ടോര്‍ പമ്പുകള്‍ ഉപയോഗിച്ച് ജലസേജനം നടത്തിയിരുന്നതും പ്രദേശവാസികള്‍ പ്രാഥമികാവിശ്യങ്ങള്‍ക്കുവരെ ഉപയോഗിച്ചിരുന്ന പുഞ്ച കുളങ്ങളാണ് സംരക്ഷണമില്ലാതെ കാടുകയറിയും മാലിന്യങ്ങളും ചാണ്ടിയും നിറഞ്ഞു നശിക്കുന്നത്.
വര്‍ഷങ്ങളായി ഇവ നശിക്കാന്‍ തുടങ്ങിയിട്ട്. തങ്ങള്‍പടി മുതല്‍ മന്ദലംകുന്നുവരെ പാടശേഖരങ്ങളോട് ചേര്‍ന്നു നിരവധി പുഞ്ചകുളങ്ങള്‍ സ്ഥിതി ചെയ്യുന്നുണ്ട്. ഇവ നീര്‍ത്തട പദ്ധതികള്‍ പ്രകാരം സംരക്ഷിക്കപ്പെടേണ്ടവയാണ്.
ഈ നിയമമുണ്ടങ്കിലും കര്‍ശനമാക്കാത്തതിനാലാണ് ഇവ നാശത്തിലേക്കു പോകുന്നത്. മേഖലയില്‍ കുളങ്ങളും ഇടത്തോടുകളും നികത്തുന്നതും വ്യാപകമാണ്.
താല്‍ക്കാലികാവശ്യങ്ങള്‍ക്ക് വാഹനങ്ങള്‍ പറമ്പിലേക്കെത്തിക്കാനാണെന്ന് പറഞ്ഞാണ് പലരും ഇവ നികത്തുന്നത്. ഉത്തവാദിത്തപ്പെട്ടവര്‍ കണ്ടില്ലെന്നു നടിക്കുന്നതായും ചിലയിടങ്ങളില്‍ മാലിന്യങ്ങള്‍ ഉപേക്ഷിക്കുന്ന സ്ഥലങ്ങള്‍ മാത്രമായി കുളങ്ങള്‍ മാറിയെന്നും കടകളില്‍ നിന്നുമുള്ള പ്ലാസ്റ്റിക് കവറുകളും മറ്റു മാലിന്യങ്ങളും രാത്രിയില്‍ വണ്ടികളില്‍ കൊണ്ടുവന്നു തള്ളുന്നതായും പരാതിയുണ്ട്.
ഇതിനെതിരേ നടപടിയെടുക്കാത്തത് പ്രതിഷേധത്തിന് കാരണമായിട്ടുണ്ട്. മുന്‍കാലങ്ങളില്‍ കനത്ത വേനലിലും ജനങ്ങളുപയോഗിച്ചിരുന്ന കുളങ്ങളും നീര്‍ച്ചാലുകളും നശിക്കുന്നതുമൂലം ശുദ്ധജലത്തിനായി വളരെപ്രയാസം സഹിക്കേണ്ടിവരുമെന്ന ആശങ്കയും ജനങ്ങള്‍ക്കുണ്ട്. അധികാരികള്‍ നിസംഗത വെടിയണമെന്നും പുനയൂര്‍ക്കുളം പഞ്ചായത്തില്‍ പെട്ട പുഞ്ച കുളങ്ങള്‍ സംരക്ഷിക്കാന്‍ കൃഷി വകുപ്പും പഞ്ചായത്തും മുന്നിട്ടിറങ്ങണമെന്ന ആവിശ്യം ശക്തമാണ്.