ജിദ്ദ: കഴിഞ്ഞ മാസം താമസസ്ഥലത്ത് ഹൃദയാഘാതംമൂലം മരിച്ച കോഴിക്കോട് മണ്ണൂര്‍ സ്വദേശി പെരിങ്ങോട്ട് വീട്ടില്‍ സുബീഷി(36)ന്റെ മൃതദേഹം നാട്ടിലെത്തിച്ചു. രണ്ട് വര്‍ഷം മുന്‍പ് റിയാദിലെത്തിയ സുബീഷ് എക്‌സിറ്റ് 15ല്‍ ഒരു അപ്‌ഹോള്‍സ്റ്ററി കടയില്‍ ജോലി ചെയ്തുവരികയായിരുന്നു. പിതാവ് സുരേന്ദ്രന്‍, മാതാവ് അംബിക, ഭാര്യ പ്രിന്‍സി, ഏക മകന്‍ അവന്തിക്. സനദ് ആശുപത്രി മോര്‍ച്ചറിയില്‍ സൂക്ഷിച്ചിരുന്ന മൃതദേഹം കേളി ജീവകാരുണ്യ വിഭാഗം ജോ: കണ്‍വീനര്‍ കിഷോര്‍ ഇനിസ്സാമിന്റെ നേതൃത്വത്തില്‍ നാട്ടുകാരും സുഹൃത്തുക്കളുമായ ഗഫൂര്‍, സന്തോഷ് കടലുണ്ടി, ഗംഗാധരന്‍ എന്നിവരുടെ സഹായത്തോടെയും തൊഴിലുടമയുടെ പൂര്‍ണസഹകരണത്തോടെയുമാണ് നടപടിക്രമങ്ങള്‍ പൂര്‍ത്തിയാക്കി കഴിഞ്ഞ ദിവസം ഇത്തിഹാദ് എയര്‍വെയ്‌സില്‍ നാട്ടിലെത്തിച്ചത്.