ചെങ്ങന്നൂര്‍: വ്യത്യസ്ത വാഹനാപകടങ്ങളില്‍ വിദ്യാര്‍ഥികളടക്കം പതിനൊന്നുപേര്‍ക്ക് പരുക്ക്. സെന്റ് ആന്‍സ് സ്‌കൂളിന്റെ ബസാണ് ഇന്നലെ പുലിയൂര്‍ കിഴക്കേനടയ്ക്ക് സമീപം അപകടത്തില്‍പ്പെട്ടത്. ഓവര്‍ടേക്ക് ചെയ്ത് വന്ന ഓട്ടോറിക്ഷയെ അപകടത്തില്‍നിന്നു രക്ഷിക്കാന്‍ ഡ്രൈവര്‍ ബസ് വെട്ടിച്ചപ്പോള്‍ നിയന്ത്രണം വിട്ട് അടുത്തുള്ള മരത്തില്‍ ഇടിക്കുകയായിരുന്നു.
ബസിലുണ്ടായിരുന്ന പത്ത് വിദ്യാര്‍ഥികള്‍ക്ക് പരുക്കേറ്റു. ഇവരെ പ്രാഥമിക ശുശ്രൂഷകള്‍ക്കുശേഷം മാതാപിതാക്കള്‍ക്കൊപ്പം വീട്ടിലേക്ക് വിട്ടു. ബസിനു കേടുപാടുകള്‍ സംഭവിച്ചിട്ടുണ്ട്. ബാക്കിയുള്ള വിദ്യാര്‍ഥികളെ സ്‌കൂളിന്റെ മറ്റൊരു ബസില്‍ സ്‌കൂളില്‍ എത്തിച്ചു.
പുത്തന്‍കാവ് ജങ്ഷന് സമീപമാണ് രണ്ടാമത്തെ വാഹനാപകടം നടന്നത്. ഇടനാട് സ്‌കൂളിലെ അധ്യാപിക സ്‌കൂട്ടറില്‍ സ്‌കൂളിലേക്ക് പോകുമ്പോള്‍ അതേ ദിശയില്‍ സഞ്ചരിച്ച സ്വകാര്യ ബസ് അമിത വേഗതയില്‍ എത്തി ഇവരെ ഇടിച്ചുതെറിപ്പിക്കുകയായിരുന്നു. അധ്യാപിക ബസിനടിയില്‍ വീണെങ്കിലും ഡ്രൈവര്‍ പെട്ടെന്ന് ബ്രേക്ക് ചെയ്തതിനാല്‍ വന്‍ ദുരന്തം ഒഴിവായി. പരുക്കേറ്റ അധ്യാപികയെ ആശുപത്രിയില്‍ എത്തിക്കാന്‍ പോലും സ്വകാര്യ ബസ് ജീവനക്കാര്‍ തയാറായില്ലെന്ന് പരാതിയുണ്ട്.