അമ്പലപ്പുഴ: ലക്ഷക്കണക്കിന് രൂപ ലേലത്തിലൂടെ ലഭിച്ചിട്ടും പാര്‍ക്കിങ് സൗകര്യം ഏര്‍പ്പെടുത്താത്തതിനാല്‍ വാഹന ഉടമകള്‍ ബുദ്ധിമുട്ടില്‍.
വണ്ടാനം മെഡിക്കല്‍ കോളജ് ആശുപത്രി വളപ്പിലാണ് പാര്‍ക്കിങ് സൗകര്യം ഇല്ലാത്തതിനെ തുടര്‍ന്ന് വാഹനങ്ങള്‍ തോന്നിയപോലെ പാര്‍ക്ക് ചെയ്യുന്നത്. അനധികൃത പാര്‍ക്കിങ്മൂലം രോഗികളുമായി എത്തുന്ന ആംബുലന്‍സുകള്‍പോലും അത്യാഹിത വിഭാഗത്തിലേക്ക് എത്താന്‍ കഴിയാത്ത അവസ്ഥയാണുള്ളത്. ഒരു വര്‍ഷത്തെ പാര്‍ക്കിംഗിന് എട്ടര ലക്ഷം രൂപയാണ് ലേലത്തിലൂടെ കരാറുകാരില്‍നിന്നും ഈടാക്കുന്നത്.
അനേകം വാഹനങ്ങള്‍ക്ക് ഒരു പോലെ പാര്‍ക്ക് ചെയ്യാനുള്ള സ്ഥലം ആശുപത്രി വളപ്പില്‍ ഉണ്ടെങ്കിലും മതിയായ പാര്‍ക്കിങ് സൗകര്യമൊരുക്കാന്‍ ആശുപത്രി അധികാരികള്‍ ഇതുവരെയും തയ്യാറായിട്ടില്ല.
കാറുകള്‍ക്ക് 10 രൂപയും ഓട്ടോറിക്ഷ, ബൈക്ക് തുടങ്ങിയ വാഹനങ്ങള്‍ക്ക് അഞ്ചു രൂപയുമാണ് പാര്‍ക്കിംഗ് ഫീസ്. പാര്‍ക്കിങ് ഏരിയ അല്ലാത്ത സ്ഥലങ്ങളില്‍ പാര്‍ക്ക് ചെയ്യുന്ന വാഹന ഉടമകളില്‍നിന്നുപോലും ഇത്തരത്തില്‍ ഫീസ് ഈടാക്കാറുണ്ട്.
മതിയായ പാര്‍ക്കിംഗ് സൗകര്യം ഒരുക്കാത്തതിനാല്‍ നിരവധി സ്ഥലങ്ങളില്‍ വാഹനങ്ങള്‍ അലക്ഷ്യമായാണ് പാര്‍ക്ക് ചെയ്യുന്നത്. അത്യാഹിത വിഭാഗങ്ങള്‍ക്ക് സമീപം വാഹനങ്ങള്‍ പാര്‍ക്ക് ചെയ്യരുതെന്ന് ബോര്‍ഡ് പ്രദര്‍ശിപ്പിച്ചിട്ടുണ്ടങ്കിലും വാഹനങ്ങള്‍ ഇവിടെകൊണ്ട് പാര്‍ക്ക് ചെയ്യാറാണ് പതിവ്.
ഇതിനെചൊല്ലി സുരക്ഷാ ജീവനക്കാരും വാഹന ഉടമകളും തമ്മില്‍ ദിനംപ്രതി വാക്കേറ്റത്തിനും സംഘര്‍ഷത്തിനും കാരണമാകുന്നു. കരാറുകാരില്‍ നിന്നും ലേലതുകയായി ലക്ഷങ്ങള്‍ ആശുപത്രി വികസന ഫണ്ടില്‍ എത്തുന്നുണ്ടെങ്കിലും അത് വേണ്ടതുപോലെ വിനിയോഗിക്കുന്നില്ലെന്നാണ് ആക്ഷേപം.