കല്‍പ്പറ്റ: പുത്തുമല ദുരന്തത്തില്‍ വീടും ഭൂമിയും നഷ്ടപ്പെട്ടവരെ പുനരധിവസിപ്പിക്കുന്നതിന് കണ്ടെത്തിയ ഭൂമിയുടെ രജിസ്‌ട്രേഷന്‍ വൈകും. ഇന്നലെ ചേര്‍ന്ന മന്ത്രിസഭാ യോഗവും വിഷയം പരിഗണിക്കാതിരുന്നതാണ് സ്ഥലമേറ്റെടുപ്പ് വൈകാനിടയാക്കുക. മേപ്പാടി പഞ്ചായത്തിലെ മില്ലുമുക്കിലെ പൂത്തക്കൊല്ലി എസ്റ്റേറ്റിലാണ് ദുരന്തബാധിതരെ പുനരധിവസിപ്പിക്കുന്നതിന് ഭൂമി കണ്ടെത്തിയിരുന്നത്. അനിശ്ചിതത്വം നിലനിന്ന ഭൂമി രജിസ്‌ട്രേഷന്‍ ചെലവ്, തോട്ടം ഭൂമി തരംമാറ്റല്‍ എന്നീ വിഷയങ്ങളിലാണ് സര്‍ക്കാരിന്റെ ഇടപെടല്‍ ആവശ്യമായിരുന്നത്. ഇന്നലെ നടന്ന മന്ത്രിസഭാ യോഗത്തില്‍ വിഷയം പരിഗണിക്കുമെന്നായിരുന്നു നേരത്തെ പഞ്ചായത്ത് അധികൃതര്‍ പറഞ്ഞിരുന്നത്. എന്നാല്‍ ഇതുസംബന്ധിച്ച ചര്‍ച്ച പേലും നടന്നില്ല.