കൊണ്ടോട്ടി: ഓടിക്കൊണ്ടിരുന്ന വാഹനത്തില്‍ നിന്ന് ഓയില്‍ ചോര്‍ന്ന് റോഡില്‍ പരന്നൊഴികിയതോടെ വാഹനങ്ങള്‍ കൂട്ടത്തോടെ അപകടത്തില്‍പ്പെട്ടു. ഇന്നലെ ഉച്ചയോടെ കൊണ്ടോട്ടി, തിരൂരങ്ങാടി റോഡില്‍ കൂട്ടാലുങ്ങലിലെ വളവിലാണ് ഓയില്‍ ചോര്‍ന്നത്. ഓയില്‍ ചോര്‍ന്ന വാഹനം പോയെങ്കിലും പിറകെ എത്തിയ വാഹനങ്ങളാണ് അപകടത്തില്‍പ്പെട്ടത്. റോഡില്‍ 150 മീറ്റര്‍ നീളത്തില്‍ ഓയില്‍ ചോര്‍ന്നിട്ടുണ്ട്. പത്ത് ബൈക്കും ഒരു കാറുമാണ് ഇതുമൂലം കുറഞ്ഞ സമയത്തിനുളളില്‍ ഇവിടെ അപകടത്തില്‍പ്പെട്ടത്.കാര്‍ നിയന്ത്രണം വിട്ട് മതിലിലിടിച്ചാണ് നിന്നത്. വാഹനത്തിലുള്ളവര്‍ക്ക് നിസാര പരുക്കേറ്റു.
അപകടം പെരുകിയതോടെ നാട്ടുകാരും കരിപ്പൂര്‍ പൊലിസും സംയുക്തമായി റോഡില്‍ നിന്ന് ഓയില്‍ നീക്കം ചെയ്യുകയായിരുന്നു. ഓയില്‍ പരന്ന ഭാഗങ്ങളില്‍ ആദ്യം മണ്ണിടുകയും പിന്നീട് വെള്ളം ഉപയോഗിച്ച് റോഡ് ശുചീകരിച്ചു. കരിപ്പൂര്‍ എസ്.ഐ എ സജിത്ത്, ലത്തീഫ് കൂട്ടാലുങ്ങല്‍, ജാഫര്‍ അനീക്കാടന്‍, ശ്രീപ്രസാദ്, കെ.കെ ഇസ്മാഈല്‍, അഫ്‌സല്‍ നല്ലേങ്ങര തുടങ്ങിയവര്‍ നേതൃത്വം നല്‍കി.