മലപ്പുറം: കര്‍ണാടക സംസ്ഥാനത്തെ മദ്‌റസകളുടെ പേരിലുള്ള വ്യാജ രസീതുകളുമായി സംസ്ഥാനത്തു പണം പിരിക്കുന്ന സംഘം സജീവമാകുന്നു. കര്‍ണാടകത്തിലെ കോലാര്‍ ജില്ലയിലെ മുള്‍ബഗല്‍ താലൂക്കില്‍ സ്ഥിതിചെയ്യുന്ന ഹുഗണി മദ്‌റസ- ഇ റഹ്മാനിയ, അറബി മദ്‌റസ-ഇ ആരിഫുല്‍ ഉലൂം തുടങ്ങിയ സ്ഥാപനങ്ങളുടെ രസീതുമായാണു സംസ്ഥാനത്തു നൂറോളം പേര്‍ വ്യാജ പിരിവു നടത്തുന്നത്. 

സാമൂഹ്യപ്രവര്‍ത്തകന്‍ മുഹമ്മദാലി പടപ്പറമ്പ് നടത്തിയ അന്വേഷണത്തില്‍ കര്‍ണാടകയില്‍ ഈ പേരുകളില്‍ മദ്രസകളോ, സ്ഥാപനങ്ങളോ പ്രവര്‍ത്തിക്കുന്നില്ലെന്നു കണ്ടെത്തി. മാത്രമല്ല, വ്യാജ പിരിവു നടത്തുന്ന സംഘത്തിനു പിന്നില്‍ സ്ഥലത്തെ വന്‍ മാഫിയ പ്രവര്‍ത്തിക്കുന്നുണ്ടെന്നും കണ്ടെത്തിയിട്ടുണ്ട്. സംഘത്തിന്റെ പ്രവര്‍ത്തനങ്ങളെക്കുറിച്ച് അദ്ദേഹം കോട്ടക്കല്‍ പൊലിസില്‍ പരാതി നല്‍കിയിരിക്കുകയാണ്.
നൂറോളം പേരാണു കേരളത്തില്‍ വ്യാജപിരിവു നടത്തുന്നത്. പിരിക്കുന്നവര്‍ക്കു മുഴുവന്‍ തുകയും കൈക്കലാക്കാം. എന്നാല്‍ ഓരോ രസീതു ബുക്കു വാങ്ങുമ്പോള്‍ 200 രൂപ കര്‍ണാടകത്തിലെ സംഘത്തലവനു നല്‍കണം. 100 താളുകള്‍ അടങ്ങിയതാണു ബുക്ക്. ഓരോ മാസവും ഈ സംഘം കേരളത്തില്‍ നിന്നു അരക്കോടിയോളം രൂപയെങ്കിലും പിരിച്ചുകൊണ്ടുപോകുന്നുണ്ട്. കേരളത്തിന്റെ വിവിധ പ്രദേശങ്ങളില്‍ തമ്പടിച്ചാണു പിരിവു നടത്തുന്നത്. കല്‍പ്പറ്റ-10, അരിയൂര്‍-10, തൊടുപുഴ-10, ആലുവ-25, മുണ്ടക്കയം-25, മലപ്പുറം പടപ്പറമ്പ്- 20 എന്നിങ്ങനെയാണു പിരിവുകാര്‍ തമ്പടിച്ചിരിക്കുന്നത്. ലോഡ്ജുകളിലും ക്വാര്‍ട്ടേഴ്‌സുകളിലുമാണു ഇവരുടെ താമസം.
റമദാന്‍ മാസത്തിലാണു വ്യാപകമായ പിരിവ്. രസീതു നല്‍കി പിരിക്കുന്നതിനാല്‍ കുറഞ്ഞത് 50 രൂപയെങ്കിലും ഓരോ വീട്ടില്‍ നിന്നു ലഭിക്കുന്നുണ്ട്. പ്രവാസിമലയാളികളുടെ വീട്ടില്‍ നിന്ന് 1000 രൂപവരെ ലഭിക്കും. മാസം 1000 രസീതു ബുക്കുകള്‍ സംഘം വിതരണം ചെയ്യുന്നതായാണു വിവരം. ഇതുവഴി രണ്ടു ലക്ഷം രൂപ സംഘത്തലവനും ലഭിക്കും. സീല്‍ പതിച്ച രസീതില്‍ സ്ഥാപനത്തിന്റെ ഫോണ്‍ നമ്പരും കൊടുത്തിട്ടുണ്ട്. ഈ നമ്പരിലേക്കു ഫോണ്‍ വിളിച്ച് അന്വേഷിക്കുന്നവര്‍ക്കു സ്ഥാപനം പ്രവര്‍ത്തിക്കുന്നുണ്ടെന്ന വിവരം ലഭിക്കും. സ്ത്രീകളെയാണു മറുപടി നല്‍കാന്‍ ചുമതലപ്പെടുത്തിയിരിക്കുന്നത്. പുരുഷന്മാര്‍ മാത്രമാണു പിരിവുകാര്‍.