മുക്കം: സേനയിലെ കാര്യക്ഷമതയും ഉത്തരവാദിത്തവും വര്‍ധിപ്പിക്കുക എന്ന ലക്ഷ്യത്തോടെ വിവിധ കാലയളവുകളില്‍ നല്‍കുന്ന പരിശീലനങ്ങളില്‍ പങ്കെടുക്കാന്‍ പൊലിസുകാര്‍ക്കു മടി. പരിശീലനങ്ങളില്‍ പങ്കെടുക്കേണ്ട പൊലിസ് ഉദ്യോഗസ്ഥര്‍ മുങ്ങിനടക്കുന്നതായുള്ള പൊലിസ് ട്രെയിനിങ് സ്ഥാപനങ്ങളുടെ പരാതിയെ തുടര്‍ന്നു നടപടി കര്‍ശനമാക്കാന്‍ സംസ്ഥാന പൊലിസ് മേധാവി ട്രെയിനിങ് എ.ഡി.ജി.പിക്കു നിര്‍ദേശം നല്‍കി.

പൊലിസ് ഉദ്യോഗസ്ഥര്‍ക്കു കൃത്യമായ പരിശീലനം ലഭിക്കാത്തതു സേനയുടെ പ്രവര്‍ത്തനത്തെ ബാധിക്കുമെന്ന് ഡി.ജി.പി ചൂണ്ടിക്കാട്ടുന്നു. പരിശീലനങ്ങള്‍ അവഗണിക്കുന്ന ഉദ്യോഗസ്ഥരുടെ നടപടിയെ ഗുരുതരമായ അച്ചടക്കലംഘനമായാണു സംസ്ഥാന പൊലിസ് മേധാവി കാണുന്നത്.
ട്രെയിനിങ് എ.ഡി.ജി.പിയുടെ നേതൃത്വത്തിലാണു പരിശീലനം, വര്‍ക്ക്‌ഷോപ്പ്, സെമിനാറുകള്‍ എന്നിവയില്‍ പങ്കെടുക്കേണ്ട പൊലിസ് ഉദ്യോഗസ്ഥരുടെ ലിസ്റ്റ് തയാറാക്കേണ്ടത്. ഇനിമുതല്‍ ലിസ്റ്റില്‍ ഉള്‍പ്പെട്ട ഉദ്യോഗസ്ഥരുടെ സമ്മതം എഴുതിവാങ്ങണമെന്നും കൃത്യമായ കാരണങ്ങള്‍ ഇല്ലാതെ പങ്കെടുക്കാത്തവര്‍ക്കെതിരേ കര്‍ശനമായ നടപടി സ്വീകരിക്കണമെന്നും ഡി.ജി.പി നിര്‍ദേശം നല്‍കിയിട്ടുണ്ട്.
ഗൗരവതരമായ ക്രമസമാധാന പ്രശ്‌നം, രോഗം, സുപ്രിംകോടതി, ഹൈക്കോടതി അല്ലെങ്കില്‍ ജുഡിഷ്യറിയുമായി ബന്ധപ്പെട്ടു ഹാജരാകേണ്ട സന്ദര്‍ഭങ്ങള്‍ എന്നിവയ്ക്കു മാത്രമാണ് ഇളവുകള്‍ അനുവദിച്ചിട്ടുള്ളത്.