ബംഗളൂരു: ആസ്‌ത്രേലിയക്കെതിരായ രണ്ടാം ക്രിക്കറ്റ് ടെസ്റ്റില്‍ ഇന്ത്യ തിരിച്ചുവരവിന്റെ പാതയില്‍. ആസ്‌ത്രേലിയയുടെ ഒന്നാം ഇന്നിങ്‌സ് 276 റണ്‍സില്‍ അവസാനിപ്പിച്ച് 87 റണ്‍സ് ലീഡ് വഴങ്ങി രണ്ടാം ഇന്നിങ്‌സ് തുടങ്ങിയ ഇന്ത്യ മൂന്നാം ദിനം കളി നിര്‍ത്തുമ്പോള്‍ നാലു വിക്കറ്റ് നഷ്ടത്തില്‍ 213 റണ്‍സെന്ന നിലയില്‍. ആറു വിക്കറ്റുകള്‍ ബാക്കിയിരിക്കേ ഇന്ത്യക്ക് 126 റണ്‍സ് ലീഡ്. ഇന്ത്യയുടെ വിശ്വസ്തരായ ചേതേശ്വര്‍ പൂജാര 79 റണ്‍സുമായും അജിന്‍ക്യ രഹാനെ 40 റണ്‍സുമായി ക്രീസിലുണ്ട്. പിരിയാത്ത അഞ്ചാം വിക്കറ്റില്‍ ഇരുവരും ചേര്‍ന്നു 93 റണ്‍സിന്റെ കൂട്ടുകെട്ടുണ്ടാക്കിയിട്ടുണ്ട്. നേരത്തെ രണ്ടാം ഇന്നിങ്‌സിലും ഓപണര്‍ കെ.എല്‍ രാഹുല്‍ അര്‍ധ സെഞ്ച്വറി കണ്ടെത്തി. 51 റണ്‍സാണു രാഹുല്‍ നേടിയത്. അഭിനവ് മുകുന്ദ് (16) രണ്ടാം ഇന്നിങ്‌സിലും പരാജയപ്പെട്ടു. പിന്നാലെയെത്തിയ നായകന്‍ വിരാട് കോഹ്‌ലി (15), സ്ഥാനക്കയറ്റം കിട്ടി ബാറ്റിങിനിറങ്ങിയ രവീന്ദ്ര ജഡേജ (രണ്ട്) എന്നിവര്‍ നിരാശപ്പെടുത്തി. രണ്ടാം ഇന്നിങ്‌സ് ബാറ്റിങ് തുടങ്ങിയ ഇന്ത്യയ്ക്ക് കെ.എല്‍ രാഹുല്‍ മികച്ച തുടക്കമാണു നല്‍കിയത്. രാഹുല്‍- അഭിനവ് മുകുന്ദ് സഖ്യം ഒന്നാം വിക്കറ്റില്‍ 39 റണ്‍സ് ചേര്‍ത്തു. പിന്നാലെ എത്തിയ പൂജാര ശ്രദ്ധയോടെ ബാറ്റു വീശി. കോഹ്‌ലിയും ജഡേജയും പെട്ടെന്നു മടങ്ങിയെങ്കിലും പൂജാരയ്ക്ക് കൂട്ടായി രഹാനെ എത്തിയതോടെ ഇന്ത്യ സുരക്ഷിതമായി മുന്നേറി. ഓസീസിനായി ജോഷ് ഹാസ്‌ലെവുഡ് മൂന്നു വിക്കറ്റുകള്‍ വീഴ്ത്തിയപ്പോള്‍ ശേഷിച്ച ഒരു വിക്കറ്റ് ഒകീഫ് നേടി.

നേരത്തെ ആറു വിക്കറ്റ് നഷ്ടത്തില്‍ 237 റണ്‍സെന്ന നിലയില്‍ മൂന്നാം ദിനം ബാറ്റിങ് തുടങ്ങിയ ഓസീസിനു 39 റണ്‍സ് കൂട്ടിച്ചേര്‍ക്കുമ്പോഴേക്കും അവസാന നാലു വിക്കറ്റുകളും നഷ്ടമായി. അശ്വിന്‍ കൊടുങ്കാറ്റാകുമെന്നു കരുതിയ പിച്ചില്‍ രവീന്ദ്ര ജഡേജയാണു മികവു പുലര്‍ത്തിയത്. ആറു വിക്കറ്റുകള്‍ പിഴുത ജഡേജയാണ് കൂറ്റന്‍ ലീഡിലേക്കു മുന്നേറിയ ഓസീസിനെ പിടിച്ചുനിര്‍ത്തിയത്. വിക്കറ്റ് കീപ്പര്‍ ബാറ്റ്‌സ്മാന്‍ മാത്യു വെയ്ഡ് 40 റണ്‍സിനും മിച്ചല്‍ സ്റ്റാര്‍ക്ക് 26 റണ്‍സിനും പുറത്തായി. ഏഴാം വിക്കറ്റില്‍ ഇരുവരും ചേര്‍ന്നു 49 റണ്‍സ് കൂട്ടിച്ചേര്‍ത്തതു ഓസീസിന്റെ ലീഡ് ഉയര്‍ത്തി. ഇന്ത്യക്കായി അശ്വിന്‍ രണ്ടും ഇഷാന്ത് ശര്‍മ, ഉമേഷ് യാദവ് എന്നിവര്‍ ഓരോ വിക്കറ്റും വീഴ്ത്തി.